Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 563 Hüküm no: 688 Orijinal metin no: [120b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mustafa’nın menzilini Hüseyin b. Üveys’e satması Husûs-ı âti’l-beyânın mahallinde ketb u tahrîri iltimâs olunmağın savb-ı şer‘-i enverden Mevlânâ Şaban Efendi b. Halil irsâl olunup ol dahi mahmiye-i İstanbul’da Sofular mahallesinde sâkine Ayşe bt. Mustafa nâm hâtunun menziline varıp zeyl-i kitâbda mektûbü’l-esâmî müslimîn huzûrunda akd-i meclis-i şer‘-i mübîn eyledikde zâtı ma‘rifet-i şer‘iyye ile ârifân Muharrem Efendi b. Muammer ve Ahmed Çelebi b. Mustafa nâm kimesneler ta‘rîfleriyle mu‘arrefe olan mezbûre Ayşe Hâtun meclis-i ma‘kūd-ı mezbûrda, bâ‘isü hâze’l-kitâb Hüseyin Efendi b. Üveys nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan Ahmed Paşa veresesi mülkleri ve iki tarafdan İshak Çelebi mülkü ve bir tarafdan tarîk-i âm ile mahdûd iki bâb fevkānî oda ve iki sofa ve tahtânî kiler ve bir matbah ve bir mikdâr zât-ı eşcâr-ı müsmire ve gayr-ı müsmire bahçe ve bir su kuyusu ve bir kenîf ve bir ahır ve bir mikdâr havluyu müştemil işbu mülk menzilimi bi cümleti’t-tevâbi‘ ve’l-levâhık ve âmmeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Hüseyin Efendi’ye altı yüz yetmiş esedî guruşa bey‘ ve temlîk ve teslîm ol dahi vech-i mübeyyen üzre iştirâ ve kabûl ve temellük ettiğinden sonra semeni olan altı yüz yetmiş esedî guruşu mûmâ-ileyh Hüseyin Efendi bana teslîm ve ben dahi yedinde bi’t-tamâm ve’l-kemâl ahz u kabz eyledim min ba‘d menzil-i mahdûd-ı mezkûrda benim alâka ve medhalim kalmayıp mezbûr Hüseyin[‘in] mülk-i müşterâsı olmuşdur keyfe mâ yeşâ ve hasbemâ yahtâr mutasarrıf olsun dedikde gıbbe’t-tasdîki’ş-şer‘î ve’t-tahkīki’l-mer‘î vâki‘ hâli Mevlânâ-yı mezbûr mahallinde tahrîr ve ba‘dehû ma‘an irsâl olunan İsmail Çelebi b. Abdullah ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mehmed Efendi b. el-Hâc İdris, el-Hâc Abdüllatîf b. el-Hâc Halil el-İmâm, Halil Çelebi b. Abdüllatîf, Hasan Çelebi b. Abdullah, Mustafa Çelebi b. Ramazan ve gayruhüm mine’l-huzzâr.