İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 360 Hüküm no: 393 Orijinal metin no: [153-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Resmî dairelere verilen yerler için Defter-i Hakani tarafından verilen senedat-ı hakaniye ve zabıtnamelere pul yapıştırılması Nezâret-i Umûr-ı Mâliye Meclis-i Mâliye Aded: 185 Ma‘rûz-ı bende-i dîrîneleridir ki, Düyûn-ı Umûmiye Meclis-i İdâresi’nden bi’l-vürûd Damga Resmî Tedkīk Komisyonu’na havâle buyrulan 28 Kânûn-ı evvel sene 323 târihli müzekkireye merbût defterin devâir-i resmiye nâmına teferruğ olunan mahaller için Defter-i hâkānîce verilen senedât-ı hâkāniye ile zabıtnâmelerine pul ilsâkı lâzım gelip gelmeyeceğinin tedkīk ve ta‘yînine dâir olan on sekiz ve yirmi numaralı fıkraları mezkûr komisyonda lede’l-mütâla‘a her ne sûretle olur ise olsun devâir-i resmiye nâmına teferruğ olunan arâzî ve emlâkden harc alınarak yalnız bu harcların ahîren ittihâz olunan karâr vechile bâ-ilmühaber îrâd ve masraf sûretiyle mahsûb edilmekde bulunduğu Defter-i hâkānî Nezâret-i celîlesinden bi’l-isti‘lâm anlaşılmış olup bu misillü devâir-i resmiyece tefevvüz olunacak emvâl-i gayr-ı menkūlenin ferâğ ve intikāline dâir zabıtnâme tanzîmi mu‘âmelesinde efrâdın iştirâki olmağla Damga Kānûnu’nun altıncı maddesi mûcebince damga resmi efrâda âid bulunmak üzere mezkûr kānûnun yetmiş üçüncü maddesi hükmüne tevfîkan nisbî münzam pul ilsâkı iktizâ edeceği ve tanzîm-i sened mu‘âmelesinde ise efrâdın alâka ve iştirâki kalmayıp bunlar sırf devâir-i resmiyeye âid ve onlara müte‘ayyen mu‘âmelâtdan ibâret [154] bulunduğundan o bâbda tanzîm ve devâir-i mezkûreye i‘tâ kılınacak tasarruf senedâtına pul ilsâkı îcâb etmeyeceği bâ-mazbata ifâde olunduğu beyân-ı âlîsiyle mûcebince muktezâsının îfâsı bu kere şeref-vârid olan 15 Mayıs sene 324 târihli ve sekiz yüz seksen yedi numaralı tezkire-i sâmîye-i sadâret-penâhîde emr u iş‘âr buyurulmuş ve Meclis-i Mâliye ifâdesiyle bi’l-cümle me’mûrîn-i Mâliye’ye ve sâir lâzım gelenlere teblîğ-i keyfiyet edilmiş olmağla beyân-ı hâle ibtidâr kılındı, ol bâbda emr u fermân hazret-i veliyyü’l-emrindir. Fî 10 Rebî‘ülâhire sene 326 ve fî 26 Haziran sene 324. Mâliye Nâzırı Mehmed Ziya