İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 359 Hüküm no: 392 Orijinal metin no: [153-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Resmî dairelerden fertlere tebliğ olunacak evrakın alındı ve teslimatı havi ilmühaberlerden damga resmi alınması Nezâret-i Umûr-ı Mâliye Meclis-i Mâliye Aded: 167 Ma‘rûz-ı bende-i dîrîneleridir ki, Düyûn-ı Umûmiye Meclis-i İdâresi Riyâseti’nden bi’l-vürûd Damga Resmî Tedkīk Komisyonu’na havâle olunan 27 Kânûn-ı evvel sene 323 târihli müzekkireye merbût defterin Damga Kānûnu’na muhâlif hareketden dolayı damga resmi ve cezâ-yı nakdînin tesviyesi ihtârını mübeyyin olarak efrâda teblîğ edilen varakanın ahz ve tesellümünü nâtık efrâd tarafından imzâ ve i‘tâ olunan teblîğ ilmühaberlerine kaç guruşluk pul ilsâkı lâzım geleceğinin tedkīk ve ta‘yînine dâir olan elli üç numaralı fıkrası mûcebince damga resminden ma‘füvv tutulan evrâk yedinci fasılda muharrer bulunan müzekkire ve i‘lâmlar ile altıncı ve yedinci fasıllarda gösterilen zabıtnâme ve musaddak sûretlerden ibâret bulunmuş olup mevzû‘-ı bahis olan meblağ ilmühaberlerinin damga resminden ma‘füvviyetine dâir başkaca bir kayd ve sarâhat bulunmadığına ve dokuzuncu madde-i kānûniyenin seksen üç numaralı fıkrasında ise devâir-i resmiyeden efrâda teblîğ olunacak evrâkın tebellüğ ve tesellümünü hâvî ilmühaberler diye tasrîh kılındığına binâen damga kānûnuna muhâlif hareketden dolayı damga resmi ve cezâ-yı nakdînin tesviyesi ihtârını mübeyyin efrâda teblîğ olunan varakaların tebellüğ ve tesellümünü nâtık olarak efrâd tarafından devâir-i resmiyeye i‘tâ olunan teblîğ ilmühaberlerinin ya o mâhiyette bulunan şerhlerin sâlifü’l-beyân dokuzuncu maddenin seksen numarasına tevfîkan yirmişer paralık maktû‘ pula teb‘iyeti iktizâ edeceği mezkûr komisyondan bâ-mazbata ifâde olunduğu beyân-ı âlîsiyle mûcebince îcâbının icrâsı şeref-vârid olan 14 Mayıs sene 324 târihli ve sekiz yüz altmış yedi numaralı tezkire-i sâmîye-i sadâret-penâhîde emr u iş‘âr buyurulmuş ve Meclis-i Mâliye ifâdesiyle bi’l-cümle me’mûrûn-i Mâliye’ye teblîğ-i keyfiyet edilmiş olmağla beyân-ı hâle ibtidâr kılındı, ol bâbda emr u fermân hazret-i veliyyü’l-emrindir. Fî 27 Cemâziyelûlâ sene 326 ve fî 14 Haziran sene 324. Mâliye Nâzırı Mehmed Ziya