İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 362 Hüküm no: 395 Orijinal metin no: [154-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mültezim ve mükelleflerin hazineye borçlarının tahsil edilmesi için tebliğ olunacak ihbarname ve haciznâmelerin damga resmine tâbi olduğu Nezâret-i Umûr-ı Mâliye Encümen-i Umûr-ı Mâliye Aded: 294 Ma‘rûz-ı bende-i dîrîneleridir, Mültezimîn ve mükellefînin Hazîne-i Celîle’ye olan borçlarının te’mîn-i tahsîli zımnında devâir-i icrâiye vesâtatıyla teblîğ olunacak ihbârnâme ve haciznâmelerin damga resmine tâbi‘ olup olmayacağı hakkında vukū‘ bulan istifsâra cevâben evrâk-ı mezkûreye ilsâk olunacak pulların bedeli bilâhare mesârif-i muhâkeme miyânında istifâ olunacağı cihetle bunlara damga kânûnunun dokuzuncu maddesinin elli beş ve seksen dört numaralı fıkraları mûcebince pul ilsâkı îcâb edeceğine dâir icrâ kılınan teblîgātın muvâfık-ı hükm-i kānûn olup olmadığının ta‘yîni Düyûn-ı Umûmiye Meclis-i İdâresi Riyâseti’nin Damga Resmî Tedkīk Komisyonu’nda mütâla‘a olunan müzekkiresinde beyân olunmasına ve haciznâme ıtlâk olunan haciz istid‘âlarının kānûn-ı mezkûrun dokuzuncu maddesinin elli beş numaralı fıkrası mûcebince iki guruşluk resm-i maktû‘a teb‘iyeti âşikâr olmağla beraber madde-i mezkûrenin seksen dört numaralı fıkrasında devâir-i resmiyeden efrâda teblîğ olunacak her nev‘ ihbârnâmelerin on paralık resme teb‘iyeti musarrah olduğuna binâen bunlara da on paralık maktû‘ pul ilsâkı hüküm ve maksad-ı kānûna muvâfık bulunduğu komisyondan bâ-mazbata ifâde olunduğu beyânıyla mûcebince muktezâsının îfâsı vârid olan fî 16 Temmuz sene 324 târihli ve bin altı yüz seksen beş numaralı tezkire-i sâmîyede iş‘âr buyurulmuş ve keyfiyet Encümen-i Umûr-ı Mâliye karârıyla îcâb edenlere teblîğ ve ta‘mîm edilmiş olmağla beyân-ı ma‘lûmâta ibtidâr kılındı, ol bâbda emr u fermân hazret-i veliyyü’l-emrindir. Fî 9 Şevval sene 326, fî 22 Teşrîn-i evvel sene 324. Mâliye Nâzırı Mehmed Ziya [155] Der-zemen-i Musa Efendizâde fazîletlü Mustafa İsmet Efendi hazretleri Fî 4 Saferü’l-hayr sene 1327