İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 364 Hüküm no: 398 Orijinal metin no: [155-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ruhbanlar adına gelip gümrüklerden geçirilecek eşyalar için verilen istidanamelerin damga resmine tâbi olmadığı Nezâret-i Umûr-ı Mâliye Encümen-i Umûr-ı Mâliye Aded: 394 Ma‘rûz-ı bende-i dîrîneleridir, Rehâbîn nâmına bi’l-vürûd ma‘füviyetlerine binâen imrârı taleb olunan eşyâ için bunlar tarafından i‘tâ eyledikleri konsolatolarca musaddak Ecnebiyyü’l-ibâre istid‘ânâmelere şimdiye kadar bir guruşluk maktû‘ pul telsîk edilmekde olduğu hâlde İtalya Devleti himâyesinde ve Trablusgarb’da bulunan Katolik râhibleri tarafından verilip İtalya General Konsolosluğu’ndan ba‘de’t-tasdîk gümrüğe gönderilen İtalyan lisânı üzere muharrer istid‘ânâmelere Resm-i Damga Kānûnu’nun ma‘füviyet faslının on altıncı ve ellinci numarasına tevfîkan pul yapıştırılmamakta [156] olduğundan bahis ile îcâbı Trablusgarb Rüsûmât Nezâreti’nden istifsâr olunduğundan ve mezkûr on altıncı numarada cevâmi‘-i şerîfe ve bi’l-umûm müessesât-ı hayriye ve mezhebiye menâfi‘ine müte‘ayyen olan ilmühaber ve şehâdetnâme ve tasdîknâme ve beyânnâme ve ihbârnâme varakaları ve ellinci numarada düvel-i Ecnebiye sefâret ve konsoloshâneleriyle diğer devâir-i resmiyenin mühür veyâ imzâsını hâvî olan takrîr ve ilmühaber ve i‘lâmlar ve sâir evrâk-ı resmiyesi damga resminden müstesnâ olduğu muharrer olmasına göre sâlifü’z-zikr istid‘ânâmeler ma‘füvv olan evrâk hâricinde kalıp husûsiyle ruhbân tarafından mümzâ olarak verilmekte olduğundan bunlara kemâ-kân pul ilsâkı lüzûmu derkâr ise de rehâbîn-i merkūme tarafından bu sûrete muvâfakat edilmemekde olduğu beyânıyla îcâbının inbâsı Rüsûmât Emânet-i celîlesinden bâ-tezkire iş‘âr olunması üzerine hükm-i kānûn ve rehâbîn-i merkūmenin ifâdâtına göre iktizâsının ta‘yîni hakkında sebk eden arz ve iş‘âra cevâben şeref-vârid olan fî 22 Teşrîn-i sânî sene 324 târihli buyruldu-yı sâmî-i hazret-i sadâret-penâhî ile sûreti teblîğ buyrulan Şûrâ-yı Devlet Tanzîmât Dâiresi mazbatasında Damga Kānûnu’nun ma‘füviyet faslının on altıncı numarasında muharrer evrâk miyânında istid‘ânâmeler muharrer değil ise de rehâbîn nâmına vürûd edip ma‘füviyetine mebnî gümrükden imrârı taleb olunan eşyâ fî 22 Teşrîn-i sânî sene 324 târihli buyruldu-yı sâmî-i hazret-i sadâret-penâhî ile sûreti teblîğ buyrulan Şûrâ-yı Devlet Tanzîmât Dâiresi mazbatasında Damga Kānûnu’nun ma‘füviyet faslının on altıncı numarasında muharrer evrâk miyânında istid‘ânâmeler muharrer değil ise de rehâbîn nâmına vürûd edip ma‘füviyetine mebnî gümrükden imrârı taleb olunan eşyâya müte‘allik olmak üzere rehâbîn-i mezbûre tarafından verilip konsolatolarca musaddak bulunan mezkûr evrâk rehâbîn nâmına vürûd eden eşyânın resm-i gümrükden ma‘füviyetini müş‘ir bir beyânnâmeden ibâret olup bu misillü evrâkın resm-i damgadan istisnâsı mezkûr on altıncı numarada gösterilmiş olmasına nazaran bunların resm-i damgadan ma‘füviyeti iktizâ edeceğinin Hazîne-i Celîle’ye teblîği tezekkür kılındığı beyân kılınmış ve keyfiyet Encümen-i Umûr-ı Mâliye ifâdesiyle ta‘mîmen devâir-i merkeziyeye ve taşra me’mûrîn-i Mâliye’sine teblîğ edilmiş olmağla arz ve beyân-ı hâle ibtidâr olundu, ol bâbda emr u fermân hazret-i veliyyü’l-emrindir. Fî 4 Zilhicce sene 326 ve fî 15 Kânûn-ı evvel sene 324. Mâliye Nâzırı Nâmına Müsteşâr ed-Dâ‘î Mahmud Esad