İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 363 Hüküm no: 397 Orijinal metin no: [155-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Matbuatta yanlış neşriyatın önüne geçilmek üzere Dahiliye Nezareti’nde bir İstihbarat kalemi kurulması Bâb-ı Âlî Dâire-i Sadâret-i Uzmâ Mektûbî Kalemi Aded: 123 Taraf-ı Âlî-i Cenâb-ı Meşîhat-penâhî’ye, Ma‘rûz-ı bende-i dîrîneleridir ki, Mukarrerât-ı devlet hakkında matbû‘ât-ı mahâlliyede fıkarât-ı mütehâlife görülmekte olup evrâk-ı havâdis tarafından yanlış neşriyât vukū‘undan tevellüd edecek sû-i tefsîrât ve te’sîrât müstağnî-yi beyân bulunduğundan buna mahâl kalmamak için gerek Takvîm-i Vekāyi‘ İdâresi’ne ve gerek icrâat-ı hükûmet hakkında ma‘lûmât talebiyle mürâca‘at eden matbû‘ât-ı mahâlliye ve ecnebiye muhbirlerine mukarrerât ve teblîgātdan neşrinde mahzûr olmayanlara dâir ma‘lûmât-ı lâzıme verilmek üzere Dâhiliye Nezâreti’nde bir İstihbârât Kalemi teşkîli nezâret-i müşârün-ileyhânın iş‘ârı üzerine münâsib görülmüş ve kalem-i mezkûrca devâirden taleb olunacak o kabîl ma‘lûmâtın i‘tâsı devâir-i merkeziyeye teblîğ edilmiş olmağla Bâb-ı Vâlâ-yı Meşîhat-penâhîlerince de ma‘lûmât-ı matlûbenin i‘tâsı için bir merci‘-i mahsûs ta‘yîni ve teshîlât-ı lâzıme irâesi bâbında emr u irâde hazret-i men-lehu’l-emrindir. Fî 29 Şevval sene 326 ve fî 11 Teşrîn-i sânî sene 324. Sadrıa‘zam Kâmil