İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 366 Hüküm no: 400 Orijinal metin no: [156-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Siyasi sebeblerden dolayı sürgüne gönderilen veya ecnebi memleketlerine firar edenlerden geri dönenlerin maaş ve görev istekleri Bâb-ı Âlî Dâire-i Sadâret-i Uzmâ Mektûbî Kalemi Aded: 175 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Mukaddemâ esbâb-ı siyâsiyeden dolayı nefy ü ta‘zîb olunup yâhûd bazı esbâba mebnî memâlik-i Ecnebiye’ye firâr edip bu kere avdetle kendilerine maâş tahsîsini taleb edenlerden bazılarına menfâlarında maâş ve yevmiye verilmemiş ve me’mûriyet-i sâbıkalarına başkaları ta‘yîn kılınmış olmak cihetiyle bunlara verilecek tahsîsât ve maâşâta karşılık bulunamadığı gibi bir takımı da müstahdemînden olmamasına ve maâşât-ı zâtiye kısmında münhalât kalmamasına [157] nazaran gerek müstahdemînden iken teb‘îd edilerek şimdi avdet edenlere bir mahalle ta‘yînlerine kadar Hazîne-i Mâliyece maâş tahsîsi ve gerek me’mûrîn ve ketebeden olmayanlardan maâş istid‘â edenlerin terfîh ve ikdârı muhtâc-ı teemmül bulunduğundan bu bâbda bir karâr ittihâz olunmak üzere sebk eden iş‘âra cevâben Meclis-i Meb‘ûsân Riyâset-i Cânib-i Âlîsi’nden gelen takrîr üzerine bi’l-havâle Şûrâ-yı Devlet Tanzîmât Dâiresi’nden kaleme alınarak Meclis-i Mahsûs-ı Vükelâ’da mütâla‘a olunan mazbatada esbâb-ı siyâsiyeden dolayı nefy ve ta‘zîb olunup veyâhûd bazı esbâba mebnî memâlik-i Ecnebiye’ye firâr edip bu kere avdet edenlerin terfîh ve ikdârı muvakkat bir hâl olmasıyla kānûn tertîbine gayr-ı muhtâc ve idâreten bir karâr ittihâzına mütevakkıf olduğu beyânıyla bu husûsda bir tedbîr ittihâzı lüzûmu dermeyân olunmasıyla îcâbı lede’l-mülâhaza menfî ve firârîlerden me’mûriyet-i sâbıkası bulunmayanların şimdi me’mûriyet yâhûd maâş ve yevmiye talebine hakları görülemeyip ancak zâten me’mûriyetde bulunanların vazîfe-i me’mûriyetlerinden dolayı bir gûne zimmet ve ilişikleri bulunmadığı hâlde mensûb oldukları nezâretlerce hidemât-ı sâbıkalarına mu‘âdil bir me’mûriyetde tercîhen istihdâmlarıyla terfîh ve ikdâmları esbâbına tevessül olunması ve bunlardan mekâtib talebesinden bulunanlara gelince içlerinde sinn-i tahsîli geçirmiş olanların be-tekrâr mektebe kayd ve kabûlleri mektebde talebe kabûlü hakkındaki kavâ‘ide muvâfık olamayacağından bu misillülerden de hüsn-i hâl ve hareket erbâbından bulunanların polislik gibi birer hizmet-i münâsibede istihdâmları husûslarının devâir-i merkeziyeye teblîği bi’t-tezekkür îcâb edenlere teblîgāt icrâ edilmiş olmağla taraf-ı âlî-i hazret-i meşîhat-penâhîlerince de iktizâsının îfâsı bâbında emr u irâde hazret-i men-lehu’l-emrindir. Fî 11 Muharrem sene 327 ve fî 21 Kânûn-ı sânî sene 324. Sadrıa‘zam Kâmil