İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 376 Hüküm no: 412 Orijinal metin no: [162-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memur olan muallimlere, kendi dersleri ve mümeyyizlikle görevlendirildikleri imtihanlara gitmek üzere izin verilmesi Nezâret-i Umûr-ı Ma‘ârif Mektûbî Kalemi Aded: 12 Taraf-ı Âlî-i Cenâb-ı Meşîhat-penâhî’ye, Ma‘rûz-ı bende-i dîrîneleridir ki, Mekâtib-i İ‘dâdiye mu‘allimîninden kısm-ı a‘zamının me’mûrînden bulunmasına mebnî munkalibü’l-hulûl olan imtihân-ı umûmilerde gerek kendi dersleri gerek mümeyyizlikle da‘vet olundukları dürûs imtihânlarında bulunmaları îcâb eylediğinden mu‘allimi bulunduğu ders imtihânı ile ellerinde bulunacak mümeyyizlik da‘vetnâmelerinde gösterilen günlerde imtihânlara gitmek üzere kendilerine me’zûniyet i‘tâsı îcâb eden devâire izbâr kılınmış olmağla makām-ı âlî-i fetvâ-penâhîlerince de iktizâsının îfâsına müsâ‘ade-i celîle-i meşîhat-penâhîleri masrûf buyurulmak bâbında emr u fermân hazret-i men-lehu’l-emrindir. Fî 28 Cemâziyelûlâ sene 327 ve fî 4 Haziran sene 325. Ma‘ârif-i Umûmiye Nâzırı