İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 377 Hüküm no: 413 Orijinal metin no: [162-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dersaadet Emvâl-i Eytâm Müdüriyeti muhasebe sorumlusunun kefalete rabtedilmesi Nezâret-i Umûr-ı Mâliye Masârıf Muhâsebesi 179 Ma‘rûz-ı bende-i dîrîneleridir, Dersa‘âdet Emvâl-i Eytâm Müdîriyeti muhâsebe mesûlünün kefâlete rabt olunarak kefile âid emlâkine hacz vaz‘ olunmadığı tedkīkāt-ı vâkı‘a netîcesinde anlaşıldığı beyânıyla gerek emvâl-i devletce gerek emvâl-i eytâm ve evkāfca zâyi‘ât vukū‘una meydân kalmamak üzere Kefâlet Nizâmnâmesi hükmünün ve Me’mûrîn-i Mülkiye Kefâlet Nizâmnâmesi’nin ahîren ta‘dîl olunan üçüncü ve sekizinci maddeleri ahkâmının devâir ve müessesât muhâsebeleriyle mâl me’mûrlarınca tamamen tatbîkine ri‘âyet olunması lüzûmuna dâir Dîvân-ı Muhâsebât Riyâseti’nden vukū‘ bulan iş‘âr üzerine sebk eden teblîğ-i sâmîye cevâben Hazîne-i Celîle’den bi’t-takdîm Şûrâ-yı Devlet’e havâle buyrulan tezkire ve bu bâbdaki muhâbere şûrâ-yı mezkûr [163] Mâliye Dâiresi’nin fî 17 Mayıs sene 325 târih ve altı yüz kırk bir numaralı buyruldu-yı âlî ile teblîğ buyrulan mazbatasında emvâl-i emîriyeyi doğrudan doğruya ahz u kabz ve sarf ile mükellef olan me’mûrîn ve küfelâsı hakkındaki usûl ve mukarrerâtın kemâ-kân tatbîk ve muhâfaza-i ahkâmıyla beraber mâla vâzı‘u’l-yed olmayan me’mûrîn-i Mâliye’nin dahi sandık emînleri zimmetinde iştirâkleri tebeyyün eylediği takdîrde zımân ile mahkûm ve mesûliyetleri derkâr olduğu gibi esâsen me’mûrîn-i mûmâ-ileyhimin ekseri âmir-i sarf olmak i‘tibâriyle bazı gûne yolsuz ve mugāyir-i nizâm ahvâl ve harekâta mücâseretleri ba‘îdü’l-ihtimâl olmadığından bu misillü me’mûrîn-i Mâliye ve küfelâsının dahi kefâlet makāmında irâe edecekleri emvâl ve emlâkin kaydları bâlâsına şerh verilmesi hukūk ve menâfi‘-i emîriyenin te’mîn ve muhâfazası noktasından ehem ve elzem görülmüş olmağla ol vechile îfâ-yı muktezâsı gösterilmiş ve keyfiyet Masârıf Muhâsebesi ifâdesiyle devâir-i merkeziyeye teblîğ edilmiş olduğundan dâire-i celîle-i ilmiyece de ona göre mu‘âmele buyurulması bâbında emr u fermân hazret-i veliyyü’l-emrindir. Fî 28 Cumâdelûlâ sene 1328 ve fî 4 Haziran sene 1325. Mâliye Nâzırı Rıfat