İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 385 Hüküm no: 418 Orijinal metin no: [168-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veznedar, sandık eminleri, telgraf ve posta memurları ile defterdar, muhasebeci, malmüdürü ve emsali memurların kefalete rabtedilmeleri Nezâret-i Umûr-ı Mâliye Masârıf Muhâsebesi 249 Ma‘rûz-ı bende-i dîrîneleridir ki, Kefâlet Nizâmnâmesi’nin üçüncü madde-i mu‘addelesinde birinci maddede muharrer me’mûriyet ve hizmetlerde bulunacaklardan veznedâr ve sandık ümenâsı ve telgraf ve posta me’mûrîni gibi doğrudan doğruya akçe ve emânât-ı sâireyi kabz ve sarf etmekle mükellef olanlar ale’l-usûl kefâlete rabtedilmedikçe işe başlatdırılmayacaklardır ve doğrudan doğruya akçeye vaz‘-ı yed etmeyen defterdâr ve muhâsebeci ve mâl müdîri ve emsâli me’mûrîn dahi vazîfe-i me’mûriyetlerine bed’ ve mübâşeret ile beraber hükm-i kefâletin mekfûlün-lehün ibtidâ-yı me’mûriyetine de şâmil olmak üzere nihâyet bir buçuk ay zarfında kefîl tedârikine mecbûrdurlar ve bu müddet zarfında kefîl vermeyenler müsta‘fî ad olunarak hemen işden men‘ olunacaklardır deyü muharrer ve nizâmnâme-i mezkûrun birinci maddesi mûcebince devâir muhâsebecilerinin dahi kefîl irâe eylemeleri lâzımeden olduğu hâlde Defter-i hâkānî muhâsebecisi Hüsnü Efendi hazretlerinin mezkûr muhâsebeciliğe târih-i ta‘yîninden bu âna değin kefâlete rabtedilmemiş olduğu nezâret-i müşârün-ileyhâdan vârid olan tezkirede iş‘âr edilmiş ve mûmâ-ileyh Hüsnü Efendi’nin zamân-ı idâresi hesâbâtının rü’yeti ile berâet-i zimmetini mutazammın i‘lâmın ale’l-usûl Hazîne’ye isrâsı lüzûmu Dîvân-ı Muhâsebât Riyâset-i Aliyyesi’ne bildirilmiş ve devâir-i sâire muhâsebecilerinden böyle kefîlsiz bulunanlar muhtemel bulunmasına mebnî madde-i nizâmiye-i mezkûrenin tamamî-i tatbîki ile kefîlsiz bulunanların hemen iş‘ârı lüzûmu devâir-i merkeziyeye inbâ kılınmış olduğundan Dâire-i Celîle-i İlmiyece de ona göre mu‘âmele buyurulması bâbında emr u fermân hazret-i veliyyü’l-emrindir. Fî 24 Cemâziyelâhire sene 327 ve fî 29 Haziran sene 325. Mâliye Nâzırı Rıfat