İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 386 Hüküm no: 419 Orijinal metin no: [168-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müzayede ve münakasa esnasında pey sürenler tarafından gösterilecek kefillerden alınacak muvakkat senedler ile kefalet şerhlerine yapıştırılacak pulların miktarı Nezâret-i Umûr-ı Mâliye Meclis-i Mâliye Aded: 152 Ma‘rûz-ı bende-i dîrîneleridir ki, Düyûn-ı Umûmiye Meclis-i İdâresi’nden bi’l-vürûd Damga Resmî Tedkīk Komisyonu’na havâle buyrulan fî 27 Kânûn-ı evvel sene 1323 târihli müzekkireye merbût defterin müzâyede ve münâkasa esnâsında pey sürenler tarafından gösterilecek kefîllerden alınacak senedât-ı muvakkate ile kefâlet şerhlerine ne mikdâr pul ilsâkı lâzım geleceğinin tedkīk ve ta‘yînine dâir olan yirmi altı numaralı fıkrası mezkûr komisyonda lede’l-mütâla‘a Damga Resmî Kānûnu’nun dokuzuncu maddesinin yirmi üç numaralı fıkrasında resmen icrâ edilecek münâkasa ve müzâyede esnâsında pey sürenler tarafından gösterilecek kefîllerden alınacak senedât-ı muvakkate diye mastûr olduğuna ve kānûn-ı mezkûrun birinci maddesinin fıkra-i ahîresinde ise damga resmine tâbi‘ evrâk ve senedât mâhiyetinde bulunan ve onların makāmına kāim olacak olan şerhlerin aynı resme tâbi‘iyeti tasrîh kılındığına binâen esnâ-yı müzâyede ve münâkasada pey sürenler tarafından irâesi lâzım gelen kefîllerin herbiri? için ayrı ayrı kefâletlerini tazammun eden şerhlerin başka başka birer guruşluk pula teb‘iyeti hükm-i kānûn iktizâsından olup hatta Safer sene 322 târihli Damga Kānûnu’nun bu misillü senedât-ı muvakkate ile o mâhiyetde bulunan şerhler beş guruşdan yirmi guruşa kadar ale’d-derecât damga resmine tâbi‘ tutulmuş iken esnâ-yı ta‘dîl kānûnunda bu misillü şerhlerin ta‘addüd etmesi hasebiyle bir müzâyede ya münâkasa kāimesi için fâhiş bir resm te’diyesi iktizâ edeceği nazar-ı i‘tibâra alınarak kānûn-ı hâzırda mezkûr kefâlet senedâtının resmi ale’s-seviye bir guruşa tenzîl edilmiş olduğu ecilden Düyûn-ı Umûmiye İdâresi’nin mütâla‘a-i mesrûrdaki maksad ve hükm-i kānûna muvâfık bulunmuş ise de resmin böyle tekrar îfâsına mahâl kalmamak üzere mültezim yâhûd müte‘ahhidin ta‘yîn olunan i‘tibâr-ı mâlîsi dâiresinde bir meblağ-ı mütezâyid üzerine pullu muvakkat bir kefâletnâme alınmak yâhûd bu bâbda zam olunacak peylerin kezâlik mecmû‘ ve gāyesi nazar-ı i‘tibâra alınarak fazla bir meblağ üzerine mezâd kāimesine bir def‘a şerh verilmek te’mîn-i maksada kâfî olacağından ona göre îfâ-yı mu‘âmele olunması ve ânifen beyân olunduğu üzere eğer küfelâya her sürülen pey için ayrı ayrı imzâ ettirilir ve bu imzâ ve mühürler bir kefîle âid olmak üzere ta‘addüd etmiş bulunur ise kānûn-ı mezkûrun birinci ve yedinci maddelerinin [169] fıkarât-ı ahîresinden ve dokuzuncu maddenin de mezkûr yirmi üç numaralı fıkrasına tevfîkan zikrolunan şerhlere birer guruşluk pul ilsâkı iktizâ edeceğinin ta‘mîmen teblîği bâ-mazbata ifâde olunduğu beyân-ı âlîsiyle mûcebince muktezâsının îfâsı şeref-vârid olan fî 22 Nisan sene 324 târihli ve altı yüz on dört numaralı tezkire-i sâmîye-i sadâret-penâhîde emr u iş‘âr buyurulmuş ve Meclis-i Mâliye ifâdesiyle ta‘mîmen me’mûrîn-i mâliyeye ve sâir lâzım gelenlere teblîğ-i keyfiyet olunmuş olmağla beyân-ı hâle ibtidâr kılındı, ol bâbda emr u fermân hazret-i veliyyü’l-emrindir. Fî 13 Cumâdelûlâ sene 326 ve fî 31 Mayıs sene 324. Mâliye Nâzırı Mehmed Ziya