İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 388 Hüküm no: 421 Orijinal metin no: [169-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kefalet senedlerini imzalayan şahısların mahcuriyetine dikkat edilmesi Bâb-ı Fetvâ Dâire-i Meşîhat-i İslâmiye Mektûbî Kalemi Aded: 5 İstanbul Kādılığı’na, Fazîletlü Efendim Hazretleri, Mu‘âmele-i tasdîkiyeleri îfâ olunmak üzere ibrâz olunan kefâlet senedlerine vâzı‘u’l-imzâ bulunanlardan bazısının inde’t-tahkīkāt mahcûriyetine kesb-i ıttılâ‘ olunmakta olduğundan kefâlet tasdîklerinde gerek hükûmet ve gerek efrâdca ileride gayr-ı kābil-i telâfî bir takım zararı müeddî olabilecek ahvâl zuhûruna mahâl kalmamak üzere Mecelle-i Ahkâm-ı Adliye’nin dokuz yüz altmış birinci maddesi sarâhatine tevfîkan mahcûriyetine hükmolunan eşhâsın hükkâm-ı âidesi tarafından resmen gazeteler ile i‘lânı ve bu bâbda alâkadâr olan devâire de teblîgāt-ı mukteziye îfâsı ve hacz mu‘âmelâtında olduğu gibi eşhâs-ı mahcûrenin emlâki var ise kezâlik hükkâm-ı âidesi cânibinden kaydları bâlâsına şerh verdirilmesi muvâfık-ı maslahat olacağına dâir Adliye Nezâreti Vekâleti’nden vârid olan tezkire üzerine Meclis-i Tedkīkāt-ı Şer‘iyye ifâdesiyle merâkiz-i vilâyât ve elviye-i gayr-ı mülhaka niyâbet-i [170] şer‘iyelerine teblîgāt icrâ kılınmış olmağla ol vechile îfâ-yı muktezâsına himmet olunması siyâkında tezkire-i muhlisî terkīm olundu. Fî 27 Receb sene 327 ve fî 1 Ağustos sene 325. Şeyhülislâm Sahib