İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 387 Hüküm no: 420 Orijinal metin no: [169-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hükümete ait eşya ve levâzım münakasalarının muhtelif gazetelerle kefalet edilmesi Bâb-ı Âlî Dâire-i Sadâret-i Uzmâ Mektûbî Kalemi Aded: 90 Taraf-ı Âlî-i Cenâb-ı Meşîhat-penâhî’ye, Ma‘rûz-ı bende-i dîrîneleridir ki, Hükûmete âid eşyâ ve levâzım münâkasaları ba‘zen pek geç neşr ve i‘lân edilmekde ve bu hâlin netîcesi olarak şerâit-i müfîde dermeyân edebilecek bir takım kesân münâkasaya iştirâk için vakt ü zamanıyla gelememekte olduğundan hükûmetin menâfi‘ine hizmet maksadıyla bu münâkasalara iştirâk edecek kesânın mikdârını tezyîd için âtiyen bi’l-cümle münâkasa i‘lânlarıyla evrâk-ı müteferri‘asının merkezi Dersa‘âdet’de Beyoğlu’nda Kabristan sokağında kırk bir numaralı Oniyon Fransez dâiresinde bulunan heyete teblîği ticâret-i ecnebiye dülgerleri heyet-i dâimesi nâmına olarak verilen varakada istid‘â edilmiş olmağla ba‘de-ezîn bi’l-umûm müzâyede ve münâkasaların cerâid-i muhtelife ile bilâ-te’hîr i‘lânıyla beraber birer sûretinin de işbu idâreye i‘tâsı ve vaktiyle i‘lânâtda bulunmayacak me’mûrînin mesûl tutulmasının usûl ittihâzı muvâfık-ı maslahat görünerek devâir-i sâireye teblîgāt icrâ edilmekle Dâire-i Celîle-i Meşîhat-penâhîlerince de ona göre icrâ-yı îcâbı bâbında emr u irâde hazret-i kefâlet lehu’l-emrindir. Fî 12 Cemâziyelâhire sene 327 ve fî 17 Haziran sene 325. Sadrıa‘zam Hüseyin Hilmi