İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 392 Hüküm no: 428 Orijinal metin no: [172-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çandarlı Kara Halil Hayreddin ve İbrahim Paşaların müstesna evkafdan İznik nahiyesi Gürmüzlü ve Tacir köylerindeki yerlerine dair verilen ilamın tebliği Bâb-ı Fetvâ Dâire-i Meşîhat-i İslâmiye Mektûbî Kalemi Aded: 8 İstanbul Kādılığı’na, Fazîletlü Efendim Hazretleri, Merhûm Çandarlı Kara Halil Hayreddin ve mahdûmu İbrahim Paşaların müstesnâ evkāfdan İznik nâhiyesinin Gürmüzlü ve Tâcir karyeleri hudûdu dâhilinde bulunan mahallere dâir Yenişehir Kazâsı Mahkeme-i Şer‘iyyesi’nden i‘tâ olunan i‘lâmın ale’l-usûl Orman ve Ma‘âdin ve Zirâ‘at Nezâreti’ne sûret-i teblîği hakkında mukaddemâ nezâret-i müşârün-ileyhâ ve Dâhiliye ve Mâliye ve Adliye makāmlarıyla cereyân eden muhâbere üzerine bi’l-havâle Şûrâ-yı Devlet-i Mülkiye Dâiresi’nden i‘tâ kılınmış olan mazbatada i‘lâmât-ı şer‘iyenin temyîz ve istînafı hakkındaki ta‘lîmâtın birinci maddesinde sûret-i i‘lâmın usûlü vechile mahkûmun-aleyhe teblîğ ettirilmesi lüzûmu münderic olup ancak i‘lâmât-ı şer‘iyenin usûl-ı teblîği hakkında ayrıca bir nizâm mevcûd olmadığından i‘lâmât-ı nizâmiyenin teblîğinde cârî olduğu vechile mahkûmun-aleyhin imzâ ve mührünü hâvî yedinden ilmühaber alınmak ve imtinâ‘ı vukū‘unda îcâb edenlere tasdîk-i keyfiyet ettirilmek gibi usûle ri‘âyet olunması îcâb edeceğinden mevzû‘-ı bahis olan i‘lâmın mahkûmun-aleyh olan Orman ve Ma‘âdin ve Zirâ‘at Nezâreti’ne o vech ile teblîğ ettirilmesi husûsunun taraf-ı mecîye iş‘ârı ve Adliye ve Dâhiliye ve Mâliye Nezâretlerine de ma‘lûmât i‘tâsı bi’t-tezekkür îcâbı icrâ edilmiş olduğu beyânıyla iktizâsının îfâsına dâir vârid olan fî 1 Cemâziyelâhire sene 1327 târihli tezkire-i sâmîye üzerine ol vechile mu‘âmele olunması Meclis-i Tedkīkāt-ı Şer‘iyye ifâdesiyle bi’l-umûm merâkiz-i vilâyât ve elviye-i gayr-ı mülhaka niyâbet-i şer‘iyelerine iş‘âr kılınmış olmağla îfâ-yı muktezâsına himmet buyurulması siyâkında tezkire-i muhlisî terkīm olundu efendim. Fî-Şa‘bân sene 1327 ve fî-Ağustos sene 3125. Şeyhülislâm Sahib