İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 394 Hüküm no: 430 Orijinal metin no: [173-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevlana Cemaleddin Efendi’nin Darü’l-hilafeti’l-aliyye kadılığına tayini Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘ü a‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în İstanbul pâyelülerinden Mevlânâ Cemaleddin Efendi -zîdet fezailehû- tevkī‘-i refî‘-i hümâyûnum vâsıl olıcak ma‘lûm ola ki, sen ki mevlânâ-yı mûmâ-ileyhsin, sen ulemâ-i fihâm miyânında hilye-i ilm ve irfân ile mütehallî ve mevsûf olarak sezâvâr-ı inâyet ve şâyeste-i mekremet-i seniyye-i şâhânem olduğuna binâen bin üç yüz yirmi yedi senesi şehr-i Ramazanü’l-mübârekinin yedinci gününden i‘tibâren Dârü’l-hilâfeti’l-aliyyem kādılığın uhde-i ehliyetine tevcîhe bi’l-fi‘il şeyhülislâm ve müfti’l-enâm olup birinci rütbe-i Osmânî ve Mecîdî nişân-ı zî-şânlarını hâiz ve hâmil olan a‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazli ve’l-yakīn Pîrîzâde Mevlânâ Sâib Bey -edâmallâhu te‘âlâ fezâilehû-’nun telhîsi üzerine şeref-efzâ-yı sünûh ve sudûr olan irâde-i seniyye-i mülûkânem muktezâ-yı münîfinden olmağla zikrolunan kādılığa ta‘yînini mutazammın Dîvân-ı Hümâyûn’umdan işbu fermân-ı celîlü’l-unvân-ı pâdişâhânem ısdâr ve i‘tâ olundu. sâlifü’z-zikr İstanbul Kādılığı’na târih-i mezkûrdan i‘tibâren mutasarrıf olup icrâ-yı ahkâm-ı şerî‘at-ı Nebeviye’ye bezl-i makdûr ve sa‘y-i mevfûr eyleyesin. Tahrîren fi’l-yevmi’l-hâdî aşer min-şehri Ramazani’l-mübârek sene seb‘a ve işrîn ve selâse mie ve elf.