İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 394 Hüküm no: 431 Orijinal metin no: [173-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eşkıya takibinde şehit olan Abdülaziz’in dul ve kimsesiz annesine maaş tahsisine dair işlemlerde geçikmeye sebep olanların cezalandırılması Bâb-ı Fetvâ Dâire-i Meşîhat-i İslâmiye Tahrîrât Kalemi Aded: 13 İstanbul Kādılığı’na, Fazîletlü Efendim Hazretleri, Eytâm ve erâmil-i askeriyenin ve ale’l-husûs muhâfaza-i vatan uğurunda mertebe-i şehâdeti ihrâz eden evlâd-ı vatanın terk eyledikleri eytâm ve erâmilin te’mîn-i ma‘îşet ve tehvîn-i zarûretleri uhde-i hamiyete müterettib vezâif-i mütehattimeden bulunduğu hâlde eşkıyâ müsâdemesinde şehîden vefât eden Abdülaziz’in dul ve bî-kes vâlidesine maâş tahsîsine dâir olan mezâbıt ve i‘lâm-ı şer‘iyenin üç yüz yirmi senesi Nisan’ından beri Aziziye Kazâsı Niyâbet-i Şer‘iyyesi’nde ilişip kaldığı Dördüncü Ordu-yı Hümâyûn Müşîriyeti’nden iş‘âr kılındığından bahisle evrâk-ı mezkûrenin teahhuruna sebebiyet verenlerin tecziyesiyle ba‘demâ bu gibi ahvâlin vukū‘a getirilmemesi zımnında teblîgāt-ı lâzıme îfâsına dâir Harbiye Nezâret-i Aliyyesi’nden vârid olan tezkire Meclis-i İntihâb-ı Hükkâma lede’l-havâle mesâlih-i vâkı‘anın ve husûsiyle efrâd ve zâbitân-ı askeriyeye âid mu‘âmelâtın günü gününe temşiyetine dikkat ve i‘tinâ olunması lüzûmunun Dersa‘âdet mehâkim-i şer‘iyesiyle bi’l-umûm merâkiz-i vilâyât ve elviye-i mülhaka niyâbet-i şer‘iyelerine teblîği ifâde olunarak ol vechile teblîğ-i keyfiyet edilmiş ve mülhakāta gönderilmek üzere işbu tahrîrâtın nüsah-ı kâfiyesi leffen isrâ kılınmış olmağla îfâ-yı muktezâsı siyâkında tezkire-i mecî terkīm olundu efendim. Fî Şevval sene 1327 ve fî Teşrîn-i evvel sene 325. Şeyhülislâm Sahib