İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 398 Hüküm no: 436 Orijinal metin no: [175-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İdane hüccetleri arkasına şer‘iye mahkemeleri tarafından yazılan ilamlara pul yapıştırılmaması Bâb-ı Fetvâ Dâire-i Meşîhat-i İslâmiye Tahrîrât Kalemi Aded: 15 İstanbul Kādılığı’na, Fazîletlü Efendim Hazretleri, İdâne hüccetleri zahrına mehâkim-i şer‘iyeden yazılan muktezî i‘lâmlarına pul yapıştırılmamak lâzım geldiği hâlde mezkûr i‘lâmların hâvî oldukları meblağa nisbeten pul ilsâk edilmekdikçe bazı icrâ dâirelerince kabûl olunmamakta olduğundan bahisle istifsâr-ı keyfiyeti mutazammın Kosava Vilâyeti Merkez Niyâbet-i Şer‘iyyesi’nden vârid olan tahrîrât üzerine sebk eden iş‘âra cevâben idâne hüccetleri akd-i müdâyeneyi mutazammın bir sened-i şer‘î olup zahriyeler ile sened-i mezkûr muhteviyâtının medyûndan lüzûm-ı tahsîli hükmünü muhtevî olmasına göre bunları i‘lâmât-ı sâireden tefrîkine mahâl olmayacağı bi’l-muhâbere Adliye Nezâreti’nden bildirildiği Mâliye Nezâreti’nden iş‘âr olunmuş ve Emvâl-i Eytâm’dan ikrâz olunan mebâliğin ber-mûceb-i nizâm tanzîm edilen idâne hüccetleri esâsen Hicaz iânesine âid on guruşluk varakaya tahrîr edilmekde olduğundan hitâm-ı müddet-i mu‘ayyenelerinde mebâliğ-i müstedânenin tahsîli zımnında zikrolunan hüccetlerin zahrlarına yazılan muktezî i‘lâmlarına da yalnız hâvî oldukları meblağ nisbetinde pul ilsâk olunduğu gibi ayrıca sûret tahrîr edilir ise yine Hicaz’a mahsûs hüccet varakalarına bi’t-tahrîr zahrlarına beş guruşluk sûret pulu vaz‘ ve ilsâk edilmekde olduğundan Emvâl-i Eytâm Müdîriyeti’nden derkenâr edilmiş ve keyfiyetin niyâbet-i mezkûreye cevâben ve sâir nüvvâba ta‘mîmen ve İstanbul vilâyeti dâhilindeki kazâlar nüvvâbına gönderilmek üzere işbu tahrîrâtın nüsah-ı kâfiyesi leffen tisyâr kılınmış olmağla icrâ-yı îcâbına himmet buyurulması siyâkında tezkire-i sitâyişverî terkīm olundu efendim. Fî 22 Şevval sene 327 ve fî 24 Teşrîn-i evvel sene 325. Şeyhülislâm Sahib