İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 404 Hüküm no: 444 Orijinal metin no: [179-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eytâm müdürlerinden alınan kefalet senetlerinin arkasına çıkarılan kayıtlardan da vergi alınması Bâb-ı Fetvâ Dâire-i Meşîhat-i İslâmiye Tahrîrât Kalemi Aded: 19 İstanbul Kādılığı’na, Fazîletlü Efendim Hazretleri, Me’mûriyetleri kefil irâesini îcâb eden me’mûrîn-i devlete kefâlet eden zevâtdan ahz edilen senedâtın zahrına çıkarılan küfelâ-i emlâk ve arâzîleri kaydından ber-mûceb-i nizâm kaydiye resmi alınmakta iken ahîren tavzîf edilen eytâm müdîrlerinin onlardan hiçbir farkı olmadığı ve husûsiyle bunlara kefâlet eden zevâtın i‘tâ edecekleri senedâtın zahrlarına çıkarılan kaydlardan alınacak resmin hukūk-ı eytâma ta‘alluk ve te’sîri olunamayacağı ve hukūk-ı Hazîne’nin muhâfazası lâzımeden bulunduğu cihetle mezkûr müdîrlere kefâlet edecek olanlardan alınacak kefâletnâme zahrına çıkarılacak kayd için dahi nizâm ve emsâline tevfîkan resm ahzı îcâb edeceğine dâir Defter-i Hâkānî Nezâreti’nden vürûd eden tezkire üzerine Meclis-i İdâre-i Eytâm ifâdesiyle bi’l-umûm hükkâm-ı şer‘iyeye teblîgāt îfâ ve mülhakāta gönderilmek üzere işbu tahrîrâtın nüsah-ı kâfiyesi leffen isrâ kılınmağla îfâ-yı muktezâsı siyâkında tezkire-i mecî terkīm olundu efendim. Fî 25 Zilka‘de sene 1327 ve fî 26 Teşrîn-i sânî sene 1325. Şeyhülislâm Sahib