İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 414 Hüküm no: 456 Orijinal metin no: [184-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tedkik-i Tensikat Encümeni’nin yetkilerine dair Meclis-i Mebusanca alınan kararın bütün dairelere tebliğ kılınması Sadâret’den 211 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Tensîk Kānûnu mûcebince devâir ve mehâkimde icrâ kılınan tensîkāt-ı ahîreden şikâyet edenlerin istid‘ânâmelerini tedkīk etmek üzere hey’ât-ı umûmiye karârıyla teşkîl edilen Encümen-i Mahsûs’un derece-i salâhiyetine dâir Meclis-i Meb‘ûsanca ittihâz olunup kuvve-i icrâiyece ma‘lûm olmak üzere meclis-i mezkûr riyâset-i celîlesinden bâ-tezkire tisyâr ve bi’l-umûm devâire teblîğ kılınan karârın bir sûreti taraf-ı âlî-i meşîhat-penâhîye irsâl kılınmış olmağla ol bâbda emr u irâde hazret-i men-lehu’l-emrindir. Fî 22 Zilka‘de sene 1327 ve fî 22 Teşrîn-i evvel sene 1325. Sadrıa‘zam Hüseyin Hilmi Sadâret’den sûret Takrîr Sûreti Tedkīk-i Tensîkāt Komisyonu’nun salâhiyet-i tahkīkıyesi şikâyet edilen tensîkāta şâmil olup sıfât-ı vekâleti tensîkāt-ı vâkı‘anın bu bâbdaki kānûnun rûh ve maksadına mülâyim ve ma‘delet ve hakkāniyetin ve menâfi‘-i umûmiye-i memleketin muktezâ-yı hakīkisine muvâfık olarak icrâ edilip edilmediğini tahkīk eylemek, şâyed esnâ-yı tahkīkātda haksızlık vukū‘u tebeyyün ederse mazbata ile meclise arz eylemek ve tahkīkātın izhâr-ı hak ve hakīkate medâr olacak sûretde cereyânını te’mînen Tedkīk-i Tensîkāt Encümeni vazîfesine âid olan dosyalar ile sâir evrâkı doğrudan doğruya nezâretlerden ve devâirden celb ve mütâla‘a edebileceği gibi şuhûd istimâ‘ eylemek hakkını dahi hâiz bulunduğu, iktizâ eder ise nâzırları da da‘vet ederek ma‘lûmâtlarına mürâca‘at edebileceği ve celb edeceği şâhidler me’mûrînden bulunur ise mensûb olduğu dâirenin nâzırları ma‘rifetiyle celb olunmak iktizâ edeceği husûslarına karâr i‘tâsıyla Tedkīk-i Tensîkāt Komisyonu’nun bu karâr dâiresinde îfâ-yı vazîfeye mübâşeret eylemek üzere mezkûr encümene havâle olunmasını teklîf ediyorum. Fî 16 Teşrîn-i sânî sene 1325. Kırkkilise Meb‘ûsu Emrullah