İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 432 Hüküm no: 480 Orijinal metin no: [195-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeni düzenlemelerde ibka edilen eytâm müdürlerinin kefalet yoklamalarının yapılması Meşîhat 8 İstanbul Kādılığı’na, Fazîletlü Efendim Hazretleri, Merkez ve mülhakātda tensîkan ibkā edilen eytâm müdîrlerinin kefâlet yoklamaları icrâ olunarak ol bâbdaki yoklama varaka-i musaddakaları ile kefâlet senedlerinin aynen irsâli ve kefâletin vilâyetlerde kırk bin ve livâlarda otuz bin ve kazâlarda yirmi bin guruşdan dûn olmamak üzere mahalleri meclis-i idârelerince eytâm sandıkları sermâyesi nazar-ı ehemmiyete alınarak ta‘yîn edilecek derecede olması ve hacizli bulunması ve mehâkim-i şer‘iye ketebesiyle hademe ve münâdîlerin tereke tahrîrine me’zûn nâhiye nâibleri var ise ma‘an kefâlet-i müteselsileye rabtedilmeleri ve kefâlet-i müteselsile senedlerinin şu vechile; ( ) zîrde vâzı‘u’l-imzâ ( ) mahkemesi ( )si umûm emvâl-i eytâmın sûret-i idâresine dâir olan nizâmnâmenin altmış sekizinci maddesi ahkâmına tevfîkan vazîfeten vaz‘-ı yed etmekte olduğumuz terekât ve terekâta müte‘allik bi’l-umûm emvâlden zimmetimize ta‘alluk edecek emvâl ve eşyâ ve nukūddan dolayı kefâlet-i müteselsile ile bi’l-emr ve’l-kabûl yekdiğerimizin zimmetine kefil ve zâmin olduğumuzu mübeyyin işbu senedi bi’t-tahtîm i‘tâ eyledik ( ) bi’t-tanzîm isrâsı husûsâtının ta‘mîmen hükkâm-ı şer‘e izbârı Meclis-i İdâre-i Eytâm’dan ifâde olunmuş ve mülhakāt nüvvâbına gönderilmek üzere işbu tahrîrâtın nüsah-ı kâfiyesi leffen tisyâr kılınmış olmağla ona göre îfâ-yı muktezâsı siyâkında tezkire-i mecî terkīm kılındı. Fî 28 Rebî‘ülevvel sene 1328 ve fî 27 Mart sene 1326. Şeyhülislâm Hüseyin Hüsnü