İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 433 Hüküm no: 482 Orijinal metin no: [195-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat edenlerin geride bıraktıkları emlakın satış ve diğer muamelelerinin kimler tarafından yapılacağı Meşîhat 5 İstanbul Kādılığı’na, Fazîletlü Efendim Hazretleri, Zevc ve zevce gibi vâris-i meşrû‘ terkiyle vefât edenlerin emlâkindeki hısas-ı mahlûlenin ifrâz ve ta‘yîni husûsâtının suver-i icrâiyesi ve teferru‘âtı hakkında Şûrâ-yı Devlet Tanzîmât Dâiresi’nden i‘tâ ve Meclis-i Mahsûs-ı Vükelâ’da mütâla‘a olunan mazbatada dermeyân olunduğu vechile emlâkin bey‘i ve sâir mu‘âmelâtının îfâsı fî 21 Receb sene 1291 târihli nizâmnâme hükmünce Defter-i hâkānî’ye muhavvel olup vârisi ve vasiyyeti olmaksızın vefât edenlerin emlâk-i mahlûlesinin [196] mezkûr nizâmnâmenin on beşinci maddesine tevfîkan Defter-i hâkānî me’mûrları tarafından satılacağı gibi zevc veyâhûd zevce misillü şer‘an hissedâr olanların hisseleri doğrudan doğruya Defter-i hâkānî me’mûrları cânibinden ifrâz olunduktan sonra kalacak kısmın me’mûrîn-i mûmâ-ileyhim ma‘rifetiyle bi’l-müzâyede satılması ve esmânının Defter-i hâkānî’ye gönderilmesi karâr-ı müttehaz iktizâsından bulunduğuna ve bir mülkde şer‘an hisse-i irsiyeye nâil olanlar emvâl-i menkūleye de aynı sûretle hissedâr olacaklarından hisse-i meşrû‘âlarını usûlen isbât ve istifâ edecekleri binâen alâ-zâlik yedlerinde sûret-i sübûtu hâvî hücec-i şer‘iye bulunacağı cihetle emlâk-i mahlûledeki hisseleri için mehâkim-i şer‘iye icrâsına mahâl görülememekle beraber da‘vâ ve muhâsamayı müstelzim bir hâl bulunmaksızın emlâk-i mahlûledeki hısas-ı emîriyenin istihsâli ve bi’l-müzâyede satılması husûsunun ale’l-ıtlâk mehâkim-i şer‘iyeye mürâca‘atla muhâkemece cereyânına ve i‘lâm istihsâline ta‘lîk-i icrâsı dahi hukūk ve menâfi‘-i emîriyenin vakt ü zamanıyla ta‘kīb ve istifâsı emrinde fevka’l-âde müşkilât ve teahhurâtı ve bîhûde masraf ihtiyârını intâc eyleyeceğine binâen sâlifü’l-beyân karâr-ı sâbık dâiresinde îfâ-yı mu‘âmele olunması lâzım gelip fakat vasiyyet ve deyn ve şuf‘a iddi‘âsı gibi ahvâl vukū‘unda mahkeme-i şer‘iyeye mürâca‘atla oradan verilecek i‘lâm üzerine mu‘âmele-i mukteziyenin îfâ kılınması husûslarının nezâret-i müşârün-ileyhâya havâlesi bi’t-tezekkür iktizâsının îfâ kılındığına dâir cevâben vârid olan fî 11 Safer sene 1328 târihli ve iki yüz altmış dokuz adedli tezkire-i sâmîye üzerine keyfiyetin ta‘mîmen hükkâm-ı şer‘e izbârı Meclis-i Tedkīkāt-ı Şer‘iyye’den ifâde olunmuş ve mülhakāt nüvvâbına gönderilmek üzere işbu tahrîrâtın nüsah-ı kâfiyesi leffen irsâl kılınmış olmağla ona göre mu‘âmele îfâsı siyâkında tezkire-i mecî terkīm kılındı. Fî 28 Rebî‘ülevvel sene 1328 ve fî 27 Mart sene 1326. Şeyhülislâm Hüseyin Hüsnü