İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 434 Hüküm no: 483 Orijinal metin no: [196-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şer‘iye mahkemeleri tarafından verilen veraset taksimi müzekkirelerinden ücret alınmaması ve bunlara pul yapıştırılmaması Meşîhat 6 İstanbul Kādılığı’na, Fazîletlü Efendim Hazretleri, Taksîm-i verâset müzekkirelerinden mehâkim-i şer‘iye ketebesi için on guruşdan yirmi guruşa kadar ücret-i tahrîriye ahzı Şûrâ-yı Devlet karârıyla bi’l-istîzân sâdır olan irâde-i seniyye îcâbından ise de mehâkim-i mezkûre ketebesinin ahîren tavzîf olunmasına ve işbu müzekkirelerin tanzîminden sonra zâten harc-ı intikāl alınmakta olup emvâl-i gayr-ı menkūlenin bilâ-sened tasarrufunu men‘ için erbâb-ı mesâliha teshîlât irâesi dahi lâzımeden bulunmasına binâen mezkûr müzekkirelerden ücret-i tahrîriye alınmaması ve meşrûhât-ı vâkı‘anın mahalle ilmühaberleri zahrına yazıldığına nazaran mezkûr müzekkirelere damga pulu dahi ilsâk olunmaması münâsib görülerek o vechile Dâhiliye Nezâreti makāmından mukaddemâ ta‘mîmen vilâyâta teblîğ olduğundan keyfiyetin bir karâra rabtına dâir sebk eden iş‘âra cevâben Resm-i Damga Tedkīk Komisyonu’ndan i‘tâ olunup bâ-buyruldu-yı sâmî teblîğ olunan mazbatada taksîm-i verâset müzekkirelerinin muhtârlar tarafından verilen şehâdetnâmeler zahrına icrâsına lüzûm görülen mu‘âmelâtda bâ-bihi’l-istinâd olmak üzere mehâkim-i şer‘iyeden yazılmakta olmasına göre devâir mu‘âmelâtından ma‘dûd Damga Kānûnu’nun mu‘âfiyât faslının yirmi sekizinci maddesi mûcebince resm-i damgadan ma‘füvv bulunduğu beyân olunduğundan ve Resm-i Damga Tedkīk Komisyonu tarafından müttehaz olan işbu karâr Düyûn-ı Umûmiye me’mûrları hazır olduğu hâlde kānûn-ı mezkûrun mu‘âfiyât faslının yirmi sekizinci maddesine tevfîkan ittihâz edilmiş olduğundan mezkûr ferâğ ve intikāl mu‘âmelâtında mehâkim-i şer‘iyeden yazılan taksîm-i verâset müzekkire ve derkenârlarına pul [197] ilsâk olunmamasından dolayı cezâ-yı nakdî ahzı lâzım gelmeyeceğine dâir Şûrâ-yı Devlet Tanzîmât Dâiresi’nden i‘tâ olunan mazbatanın leffiyle vârid olan fî 21 Muharrem sene 1328 târihli ve iki yüz elli bir adedli tezkire-i sâmîye üzerine keyfiyet Meclis-i Tedkīkāt-ı Şer‘iyye ifâdesiyle ta‘mîmen hükkâm-ı şer‘e izbâr ve mülhakāt nüvvâbına gönderilmek üzere işbu tahrîrâtın nüsah-ı kâfiyesi leffen isrâ kılınmış olduğunun beyânıyla tezkire-i mecî terkīm kılındı. Fî-selhi Rebî‘ülevvel sene 1328 ve fî 28 Mart sene 1326. Şeyhülislâm Hüseyin Hüsnü