İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 439 Hüküm no: 489 Orijinal metin no: [199-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demiryolu, liman vs. müesseselerin keşiflerinde geçici görevlendirilen memurların maaşları Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir, Demiryolu ve liman ve sâir müessesât-ı nâfi‘a istikşâfâtı için birkaç ay müddetle muvakkaten ta‘yîn olunan me’mûrîn-i fenniye maâşâtından fark-ı terakkī ve zam tevkīfi îcâb edip etmeyeceği istîzânına dâir Ticâret ve Nâfi‘a Nezâret-i celîlesinin tezkire-i muhavvelesi üzerine Şûrâ-yı Devlet Tanzîmât Dâiresi’nden i‘tâ olunan mazbatada Mülkiye Tekā‘üd Sandığı kānûn-ı cedîdinin yirmi dokuzuncu maddesinin bir fıkrasında me’mûrîn-i muvazzafadan ve mütekā‘idînden ya maâş olan ma‘zûlînden olup daha ziyâde maâşlı bir me’mûriyete ta‘yîn olunanların yâhûd bulundukları me’mûriyetde maâşı terakkī edenlerin ilk bir aylık maâşlarının mikdâr-ı munzamları tevkīf olunacağı muharrer olmasına nazaran bunlardan daha ziyâde maâşlı bir me’mûriyete ta‘yîn olanların maâşlarından mikdâr-ı munzamlarının sandık için tevkīfi muktezî olarak hâlbuki uhdelerindeki me’mûriyet bâkī olmak ve tekā‘üd ya ma‘zûliyet maâşı kat‘ olunmamak üzere muvakkaten bir mahalle i‘zâm olunacaklara zamm-ı maâş nâmıyla akçe i‘tâsına Büdce Kānûnu ahkâmı müsâ‘id olmadığından bu makūlelere ücret-i maktû‘a ya harc-ı râh i‘tâ olunarak muhâlif-i kānûn mu‘âmele icrâsına meydân verilmemesinin nezâret-i müşârün-ileyhâya cevâben ve devâir-i sâireye ta‘mîmen teblîği tezekkür edildiği ifâde ve îcâbı icrâ olunmağla mûcebince iktizâsının îfâsı bâbında emr u irâde hazret-i men-lehu’l-emrindir. Fî 17 Rebî‘ülevvel sene 1328 ve fî 16 Mart sene 1326. Sadrıa‘zam Hakkı