İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 440 Hüküm no: 490 Orijinal metin no: [199-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nizamiye hizmetinde iken silah altına alınan memur ve ketebenin memuriyet ve maaşlarının Harbiye Nezaretince tanzimi Sadâret’den 19 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir, Hizmet-i nizâmiyeye dâhil olan bâ-sınıf ihtiyât ve redifde iken silâh altına alınan me’mûrîn ve ketebenin me’mûriyet ve maâşlarına dâir Harbiye Nezâret-i Celîlesince tanzîm ve Şûrâ-yı Devlet ve Meclis-i Vükelâca ta‘dîl olunup mer‘iyyet-i ahkâmına bi’l-istîzân irâde-i seniyye-i cenâb-ı pâdişâhî şeref-müte‘allik buyrulan mevâdd-ı nizâmiyenin sûret-i matbû‘ası leffen isrâ ve devâir-i sâireye de teblîgāt icrâ edilmiş olmağla îfâ-yı muktezâsı bâbında emr u irâde hazret-i men-lehu’l-emrindir. Fî 14 Rebî‘ülevvel sene 328 ve fî 13 Mart sene 1326. Sadrıa‘zam Hakkı [200] Me’mûrîn ve ketebeden hizmet-i askeriyeye alınacaklar hakkında olunacak mu‘âmeleye dâir mevâdd-ı nizâmiye sûretidir. Birinci madde: Vezâif-i müstakille veyâ müştereke ashâbından olsun bi’l-umûm me’mûrîn ve ketebeden hizmet-i muvazzafa-i nizâmiyeye dâhil olanlar me’mûriyetlerinden infikâkleri târihinden i‘tibâren ma‘zûl ad olunacaklar ve hitâm-ı müddet-i askeriyelerinde me’mûriyet-i sâbıkalalarına mu‘âdil olarak ilk açılacak me’mûriyetlere sâirlerine tercîhen ta‘yîn edileceklerdir. İkinci madde: Bi’l-umûm me’mûrîn ve ketebeden ihtiyât veyâ redif veyâhûd müstahfızlıkları esnâsında silâh altına alınanlar vezâif-i müştereke ashâbından olsun olmasın me’zûn ad olunarak bunların me’mûriyetlerine mahsûs maâşlarının bir sülüsü âilelerine ve sülüsânı yerlerine ta‘yîn kılınacak vekîllere verilecekdir. Sâlifü’z-zikr me’mûriyetden sınıf-ı ihtiyât veyâ redife dâhil olub da ta‘lîm maksadıyla silâh altına celb olunanlar ile üç ay müddetle hizmet-i ta‘lîmiyesini îfâ etmek üzere hizmet-i muvazzafası için bedel-i nakdî verenler işbu ta‘lîm müddeti esnâsında me’zûn ad edilerek maâşlarını tâm olarak alacaklardır. Şu kadar ki vezâif-i müstakille ashâbından oldukları yâhûd hizmet-i devletden infikâklerinde yerlerine vekîl ta‘yîni lâzım geldiği hâlde maâşları hakkında işbu maddenin fıkra-i ûlâsı mûcebince mu‘âmele olunacakdır. Fî 7 Rebî‘ülevvel sene 1328 ve fî 6 Mart sene 1326.