İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 444 Hüküm no: 497 Orijinal metin no: [201-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazine-i Celile teşkilatının yeniden yapılandırılması Mâliye Nezâreti Kalem-i Mahsûs Birinci Şu‘be 23 Ma‘rûz-ı bende-i dîrîneleridir, Hazîne-i Celîle’nin bu def‘aki teşkîlâtında mevcûd şu‘beler bi’t-tevhîd Vâridât, Hesâbât, Düyûn-ı Umûmiye, Me’mûrîn, Kalem-i Mahsûs, Heyet-i Teftîşiye, Vezne, Emlâk, Beytü’l-mâl, Hukūk Müşâvirliği nâmlarıyla on müdîriyete tefrîk ve taksîm edilerek bunların herbiri vilâyât ve devâir-i merkeziye ile doğrudan doğruya nezâret nâmına muhâbere etmekte olup mezkûr müdîriyetlerden yazılacak tezâkir ve muharrerâta cevâb tastîr olunacağı zaman her hâlde falan müdîriyetden yazılan falan târihli ( ) umûmi/husûsi numaralı tezkire veyâ tahrîrât-ı cevâbîdir denilmesi lâzım geleceği gibi telgrafnâme cevâblarında dahi C Mart sene 326, 112 vâridât [202] veyâhûd hesâbât diyerek hangi müdîriyetden yazılmış telgrafnâmeye cevâb olduğunun behemehâl gösterilmesi ve te’kîd veyâ zeyl olarak vukū‘ bulacak iş‘ârâtda mukaddemki tezkire ve tahrîrât ve telgrafnâmenin yalnız târihinden bahs ile iktifâ edilmeyerek numarasının dahi zikredilmesi elzemdir. Ba‘demâ nezâretden keşîde olunacak telgrafnâmelerin başında keşîde eden müdîriyetin tasrîh edileceği takarrur ettiğinden her hâlde şu usûle be-gāyet i‘tinâ edilmesi ve numarasız olarak telgraf keşîde kılınmaması ehemmiyetle ricâ olunur efendin, ol bâbda emr u fermân hazret-i veliyyü’l-emrindir. Fî 30 Rebî‘ülevvel sene 328 ve fî 29 Mart sene 326. Mâliye Nâzırı Nâmına Kalem-i Mahsûs Müdîri