İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 444 Hüküm no: 498 Orijinal metin no: [202-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İhtiyat ve redif sınıfında iken silah altına alınan memur ve kâtiplerin memuriyet maaşları Dâire-i Sadâret Tahrîrât Kalemi 87 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir, Dâhil-i esnân-ı askeriye olan ve sınıf-ı ihtiyât ve redifden iken silâh altına alınan bi’l-umûm me’mûrîn ve ketebenin me’mûriyet maâşlarına mütedâir mevâdd-ı nizâmiyede me’mûrîn ve ketebeden hizmet-i muvazzafa-i nizâmiyeye dâhil olanların me’mûriyetlerinden mün‘azil ad olunacağı ve ihtiyât ya redif ya müstahfızlıkları esnâda silâh altına alınanların maâşlarının bir sülüsünün âilelerine ve sülüsânının vekîllerine ve sınıf-ı ihtiyât yâhûd redife dâhil olup da ta‘lîm maksadıyla silâh altına celb olunanlarla bedel-i nakdî verenlerin ta‘lîm müddeti esnâsında me’zûn addiyle tâm maâşlarının i‘tâ kılınacağı muharrer ise de kadro hâricinde kalan me’mûrîn ve ketebeden taht-ı silâha alınacaklar hakkında olunacak mu‘âmeleye dâir sarâhat olmadığından bahisle istifsâr-ı mu‘âmeleyi mutazammın Mâliye Nezâret-i celîlesinin tezkire-i muhavvelesi üzerine Şûrâ-yı Devlet Tanzîmât Dâiresi’nden i‘tâ ve Meclis-i Mahsûs-ı Vükelâ’da mütâla‘a olunan mazbatada gösterildiği vechile kadro hârici maâş almakta iken ismine kur‘a isâbetle hizmet-i muvazzafa-i nizâmiyeye alınanların bir me’mûriyete ta‘yîn edilmiş hükmünde olması i‘tibâriyle kadro hârici maâşlarının kat‘ı münâsib olacağı gibi me’mûrlardan ihtiyât ya redif yâhûd müstahfız olarak silâh altına celb olanların sülüs maâşlarının âilelerine terki kānûn-ı mahsûs ahkâmından olmasına ve kadro hâricinde kalanların almakta oldukları ma‘zûliyet maâşlarının mikdârı ise maâş-ı aslîlerine nazaran sülüs derecesinde bulunmasına binâen bunlardan ihtiyât, redif ve mustahfız olarak silâh altına da‘vet olunanlara maâşlarının i‘tâsı lâzım geleceğinin devâire ta‘mîmen teblîği tezekkür ve iktizâsı îfâ kılınmış olmağla îcâbının icrâsı bâbında emr u irâde hazret-i men-lehu’l-emrindir. Fî 6 Cumâdelûlâ sene 1328, fî 3 Mayıs sene 1326. Sadrıa‘zam Hakkı