İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 446 Hüküm no: 500 Orijinal metin no: [203-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halkalı, Selanik ve Bursa Ziraat mektepleri talebelerinden alınan ücretle bunlara sarfedilen miktarın denkleştirilmesi Dâire-i Sadâret Tahrîrât Kalemi 32 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Üç yüz yirmi beş senesinde Halkalı ve Selanik ve Bursa Zirâ‘at mekteblerine devam eden talebeden ücret olarak alınan mebâliğ ile bunlara vukū‘ bulan sarfiyâtın dâhil-i muvâzene edilmesine dâir tanzîm ve Meclis-i Umûmice tasdîk olunan mevâdd-ı kānûniye hakkında Hey’ât-ı A‘yânca kaleme alınan karârnâmede Muvâzane Kānûnu’na dâhil bulunmayan vâridât ve sarfiyâtda tahsîl ve sarfı memnû‘ ve bu cihet üç yüz yirmi beş senesi Büdce Kānûnu’nda dahi musarrah olmasına binâen Orman ve Ma‘âdin ve Zirâ‘at Nezâretince bu sûretle büdce hâricinde ücret istifâ ve elde edilen mebâliğin sarf ve ibkā olunması muhâlif-i kānûn görüldüğünden hilâf-ı kānûn bu gibi ahvâlden tevakkī edilmesi zımnında devâir-i merkeziyeye teblîgāt-ı umûmiye îfâsı lüzûmu inbâ ve nezâret-i müşârün-ileyhâ ile devâir-i sâireye vesâyâ icrâ kılınmış olmağla Dâire-i Celîle-i İlmiyece de ona göre icrâ-yı îcâbına himmet buyurulması bâbında emr u irâde hazret-i men-lehu’l-emrindir. Fî 21 Rebî‘ülevvel sene 1328, fî 20 Mart sene 1326. Sadrıa‘zam Hakkı