İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 447 Hüküm no: 502 Orijinal metin no: [203-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Paşa Mahkemesi’nden verilen ikrar-ı deyn ve vekaleti bildiren hüccetin muameleye esas olması Meşîhat 142 Hülâsa: Mahmud Paşa Mahkeme-i Şer‘iyyesi’nden 23 Rebî‘ülevvel sene 1328 târihinde sâdır olan ikrâr-ı deyn ve vekâleti nâtıka hüccete iş‘âr-ı ahîre kadar ibtinâ-yı mu‘âmele olunmasına dâir. İstanbul Kādılığı’na, Fazîletlü Efendim Hazretleri, Karîn-i esbak müteveffâ Yâver Bey’in veresesinden sulbî kebîr oğlu Mahmud Hilmi Bey’in öteden beri dâü’l-kü’ûle mübtelâ ve sefîh ve müsrif ve mübezzir olmasından nâşî kassâm-ı umûmilikçe hacrine teşebbüs olunarak bu bâbda hükm-i lühûkundan beş gün evvel ve pederi müteveffâ-yı mûmâ-ileyhin vefâtından yirmi beş gün sonra mahcûr-ı mûmâ-ileyhi şu hâlinden bi’l-istifâde da‘vâ vekîllerinden Tarabcıyan? Toros Efendi v. Bedros iğfâl ederek kendi oğlu Pervant Efendi ile birlikde mûmâ-ileyh Mahmud Bey’i Mahmud Paşa Mahkeme-i Şer‘iyyesi’ne getirip müteveffâ-yı mûmâ-ileyhden menkūl [204] ve gayr-ı menkūl bi’l-cümle tereke ve nukūd ve eşyâ ve emlâk ve akārâtından mûmâ-ileyh Mahmud Bey’in hisse-i irsiyesini taleb ve da‘vâ ve muhâkemeye ve sulh ve ibrâya ve ahz u kabza ve zabta ve bey‘ u ferâğa ve bi’l-cümle makbûzundan vekîl-i mûmâ-ileyhin oğlu Pervant Efendi’ye zimmetinde deyn-i sahîhi olan iki bin yüz aded tâm Osmanlı altınını mûmâ-ileyh Pervant Efendi’ye i‘tâya ve âharı tevkîl ve azle kendisini vekâlet-i devriye ile tevkîl ettirerek ol bâbda mahkeme-i mezkûreden 23 Rebî‘ülevvel sene 1328 târihli bir kıt‘a hüccet-i şer‘iye istihsâl eylemiş ve hüccet-i mezkûre târihinden beş gün sonra dahi Muhallefât-ı Umûmiye Kassâmlığınca mûmâ-ileyh Mahmud Bey’in dâü’l-kü’ûle mübtelâ ve mübezzir ve müsrif ve sefîh olduğu zâhir olmağla tasarrufât-ı kavliyesinden hacr olunup kesb-i salâh edinceye kadar mâlını hıfz u hırâset ve umûrunu tesviye ve rü’yete kız karındaşı Makbûle Hanım vasî ta‘yîn kılınarak ol bâbda 28 Rebî‘ülevvel sene 1328 târihli bir kıt‘a hüccet-i şer‘iye i‘tâ edilmiş ve vasîyy-i mûmâ-ileyhânın sâlifü’l-beyân vekâlet-i devriye ve ikrâr-ı deyni mutazammın hüccete bâ-lâyiha vukū‘ bulan i‘tirâzı üzerine Meclis-i Tedkīkāt-ı Şer‘iyye karârıyla mezkûr hüccet li-ecli’l-muhâkeme Rumeli Kādıaskerliği Dâiresi’ne havâle olunmuş ve mûmâ-ileyh Mahmud Bey’in mahcûriyetine ve mezkûr ikrâr-ı deyn ve vekâleti nâtıka hüccetin li-ecli’l-muhâkeme dâire-i mezkûreye havâle olunduğundan netîce-i muhâkemeye kadar zikredilen hüccet ma‘mûlün-bih senedât-ı şer‘iyeden olamayacağına ve vekîl-i mûmâ-ileyh hüccet-i mezkûreyi isti‘mâl ile mahcûr-ı mûmâ-ileyhin emvâlini izâ‘e eylemesi melhûz bulunmasına binâen iş‘âr-ı ahîre kadar mezkûr hüccete ibtinâ-yı mu‘âmele olunmaması husûsunun mehâkim-i şer‘iye ve nizâmiye ve mukāvelât muharrirlikleriyle Defter-i hâkānî Nezâret-i Aliyyesi’ne teblîği lüzûmu Rumeli Kādıaskerliği’nden bâ-müzekkire ifâde ve Adliye Nezâret-i celîlesiyle Defter-i Hâkānî Nezâret-i Aliyyesi’ne iş‘âr-ı keyfiyet kılınmış olmağla ol vechile îfâ-yı muktezâsı siyâkında tezkire-i muhlisî terkīm kılındı. Fî 9 Receb sene 1328 ve fî 3 Temmuz sene 1326. Şeyhülislâm Musa Kâzım