İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 449 Hüküm no: 503 Orijinal metin no: [204-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki kıtalarda asker olup da mahkemeye getirilmesi gerekenlerin jandarma alay kumandanlıklarından istenmesi Harbiye Nezâreti Muhâkemât Dâiresi 9 Ma‘rûz-ı bende-i dîrîneleridir ki, Dersa‘âdet şer‘‘ât-ı askeriyesinden mehâkim-i şer‘iyeye ihzârı îcâb eden ümerâ ve zubbât ve efrâd-ı nizâmiyenin merkez ve jandarma zâbıtân ve efrâdının da Dersa‘âdet ve mülhakātı jandarma alayı kumandanlıklarından taleb olunmaları mehâkim mu‘âmelâtının sür‘at-i cereyânını te’mîn edeceğinden ba‘demâ ol vechile mürâca‘atda bulunulması için Dersa‘âdet mehâkim-i şer‘iyesine teblîgāt-ı mukteziye icrâsı husûsunun savb-ı âlî-i meşîhat-penâhîlerine arz ve iş‘ârı Muhâkemât Dâiresi’nden ifâde kılınmış olmağla îfâ-yı muktezâsı bâbında emr u fermân hazret-i veliyyü’l-emrindir. Fî 4 Rebî‘ülâhir sene 328 ve fî 1 Nisan sene 326. Harbiye Nâzırı Nâmına Fuad