İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 459 Hüküm no: 516 Orijinal metin no: [210-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dairelerden postaya verilen resmi yazıların mahiyetleriyle tahrirat tarihi ve numaralarının sevk varakalarında gösterilmesi Mâliye Nezâreti Vâridât-ı Umûmiye Müdîriyeti Dördüncü Şu‘be Umûmi: 11222 Husûsî: 36 Huzûr-ı Âlî-i Cenâb-ı Meşîhat-penâhî’ye, Ma‘rûz-ı bende-i dîrîneleridir, Devâirden posta vâsıtasıyla vâki‘ olan mürâselât-ı resmiyenin mâhiyetleriyle onlara müte‘allik olan tahrîrât numara ve târihlerinin sevk varakalarında gösterilmemekte olması bu gibi mürâselâtın evrâkı vürûduyla taharrîsine kadar ba‘zen tûl müddet postahânelerde kalmasını ve bu da bilâhare müşkilât hudûsunu istilzâm eylediği anlaşılmışdır. Mürâselât-ı resmiyenin mâhiyetleriyle ol bâbda yazılan tahrîrât numara ve târihlerinin sevk varakalarına mücmelen şerh olunması mukaddemâ usûl ittihâz ve bu kerede te’yîd edildiği ve bu usûle mürâ‘ât olunduğu hâlde bu yüzden mütehaddis teahhurât ve müşkilâta mahâl kalmayacağı ve müddet-i mu‘ayyene zarfındna aranılmayan resmî paketler hakkında Dâhilî Paket Nizâmnâmesi’nde bir kayd ve sarâhat mevcûd olmadığından bu bâbdaki ahkâm-ı nizâmiyenin resmî paketler hakkında dahi tamamen tatbîki tabî‘i bulunduğu Posta ve Telgraf Müdîriyet-i Umûmiyesi’nden bildirilmiş ve ol vechile icrâ-yı îcâbının lâzım gelenlere teblîği ta‘mîmen devâir-i merkeziyeye iş‘âr kılınmış olmağla Dâire-i Celîle-i Meşîhat-penâhîlerince de muktezâsının îfâ buyurulması bâbında emr u fermân hazret-i veliyyü’l-emrindir. Fî 5 Zilka‘de sene 1328 ve fî 25 Teşrîn-i evvel sene 326. Mâliye Nâzırı Nâmına Müsteşâr Reşad