İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 467 Hüküm no: 526 Orijinal metin no: [215-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memurların senede belirli bir müddet istirahat ve seyahat edebilmek üzere izin isteyebilecekleri Sadâret’den 195 Taraf-ı Vâlâ-yı Hazret-i Meşîhat-penâhî’ye, Ma‘rûz-ı bende-i dîrîneleridir, Me’mûrînin senede mu‘ayyen bir müddet ile istirâhat ve seyr ü seyâhate sûret-i me’zûniye[t]leri hakkında Harcırâh Karârnâmesi’nin madde-i mahsûsuna tezyîl edilmek üzere kaleme alınan lâyiha-i nizâmiyenin mevki‘-i tatbîka vaz‘ı husûsuna Şûrâ-yı Devlet ve Meclis-i Mahsûs-ı Vükelâ karârıyla bi’l-istîzân irâde-i seniyye-i cenâb-ı hilâfet-penâhî şeref-müte‘allik buyrularak devâir-i merkeziyeye teblîgāt icrâ ve sâlifü’z-zikr mukar[re]rât-ı nizâmiyenin Dîvân-ı Hümâyûn Kalemi’nden musaddak sûreti leffen savb-ı âlî-i meşîhat-penâhîlerine isrâ kılınmış olmağla iktizâsının îfâsı bâbında emr u irâde hazret-i men-lehu’l-emrindir. Fî 9 Ramazan sene 1328 ve fî 2 Ağustos sene 1326. Sadrıa‘zam Nâmına Adliye Nâzırı Necmeddin Harcırâh Karârnâmesi’nin on dördüncü maddesine zeyl edilmek üzere kaleme alınan fıkarâtın sûretidir. Merkez ve taşraca me’mûrîn ve müstahdemîn-i devlet gerek istirâhat ve gerek seyâhat edebilmek üzere her sene bir ay me’zûniyet istihsâl edebilirler. Mütevâliyen iki sene bu salâhiyetden istifâde etmemiş olanlara iki ay, bu hakkı kezâ mütevâliyen üç sene isti‘mâl etmeyenlere üç ay me’zûniyet i‘tâ kılınır. İşbu müddetler zarfında kendilerine maâşları tâm olarak verilir. Hasbe’l-lüzûm vekâlet edeceklere bir şey verilmez, üç seneden ziyâde bu yolda ruhsat isti‘mâl etmemiş olanlara bundan dolayı fazla me’zûniyet verilmeyip müddet-i terhîsi her hâlde üç ayı tecâvüz edemez. Umûr ve mesâlih-i devletin bu gibi ruhsatlardan dolayı hiçbir vechile haleldâr olmamasına nâzır ve âmirler tarafından i‘tinâ edilerek bu bâbda îcâb-ı maslahat ve usûl-i münâvebe gözetilecektir. Bu yolda me’zûniyet talebinde bulunan me’mûrîn ve müstahdemîn mensûb oldukları nezâret veyâ idârenin en büyük âmiri tarafından bilâ-istîzân ruhsat verilebilecekdir. Fî 17 Receb sene 1328, fî 11 Temmuz sene 1326. Aslına mutâbıkdır. Dîvân-ı Hümâyûn Kalemi