İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 466 Hüküm no: 525 Orijinal metin no: [214-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dersaadet Rüsûmat Başmüdüriyeti kâtiplerinden Muhyiddin Sami Efendi’nin maaşından Hıristo v. Avram’a olan borcunun kesilmesi Sadâret’den 14 Taraf-ı Âlî-i Meşîhat-penâhî’ye, Ma‘rûz-ı bende-i dîrîneleridir, Dersa‘âdet Rüsûmât Başmüdîriyeti ketebesinden Muhyiddin Sâmi Efendi zimmetinde Bakkāl Hıristo v. Avram’ın alacağı olan doksan dört buçuk guruşun te’mîn-i istifâsı için maâş rub‘unun bi’t-tevkīf irsâli Dersa‘âdet Bidâyet Mahkemesi Riyâseti’nden iş‘âr olunması üzerine mûmâ-ileyh Muhyiddin Efendi geçen sene taht-ı silâha alındığı ve maâş-ı muhassası bulunan üç yüz guruşun yalnız sülüsü olan yüz guruş nizâmen âilesine verilmekte olduğu cihetle bu deynin tesviyesi için maâş-ı muhassası rub‘unun tevkīfi mûmâ-ileyhin terhîsiyle avdetine ta‘lîk edilmiş olup ma‘a hâzâ mûmâ-ileyh henüz terhîs edilmemiş olduğundan âilesine verilmekte olan sülüs maâşdan rub‘unun tevkīfi câiz olup olmayacağı Rüsûmât Müdîriyet-i Umûmiyesi’nden istifsâr olunduğundan ve me’mûrîn maâşâtından düyûn-ı mahkûmesine mukābil rub‘ maâş tevkīfâtı tâm maâşa istihkāk kesb edenler için mukarrer olup böyle silâh altına alınan me’mûrîn âilesinin te’mîn-i iâşeleri için nizâm-ı mahsûs mûcebince i‘tâ edilmekde olan sülüs maâşlarından me’mûr-ı medyûnun deynine mahsûben akçe tevkīfi hakkında bir karâr bulunmadığından bahisle istifsâr-ı mu‘âmeleye dâir Mâliye Nezâret-i celîlesinin tezkire-i muhavvelesi üzerine taht-ı silâha alınan bir me’mûrun maâşından sülüsünün âilesine verilmesindeki maksad-ı kānûni âilenin zarûretden vikāyesine ma‘tûf olmasına ve sülüs maâşdan o me’mûrun hükmen tebeyyün eden deyninden dolayı rub‘unun kat‘ı o makūle gayr-ı kābil-i telîf bulunmasına ve İcrâ Kānûnu’nun elli üçüncü maddesinin fıkra-i sâniyesi de bunu müeyyed görülmesine binâen mûmâ-ileyh Muhyiddin Sâmi Efendi âilesine verilmekte olan sülüs maâşından rub‘unun tevkīfi câiz olamayacağı Şûrâ-yı Devlet Tanzîmât Dâiresi’nden bâ-mazbata [215] inbâ ve devâir-i merkeziyeye teblîgāt îfâ edilmişdir, ol bâbda emr u irâde hazret-i men-lehu’l-emrindir. Fî 27 Rebî‘ülevvel sene 1329, fî 16 Mart sene 1327. Sadrıa‘zam Hakkı