Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 55 Hüküm no: 13 Orijinal metin no: [2M/a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başıbüyüklü köyünden bir şahsın haksız yere zindana atıldığını söyleyerek affını istemesi Adalar nâibi efendi şer‘le görüp i‘lâm eyleye deyü buyuruldu. Devletlü sa‘âdetlü merhametlü sultanım hazretleri sağ olsun. Bu kulları karye-i Başıbüyüklü fukarâsı ahâlîsinden olup ( ) nâm kimesne gün va‘de ile Kürt Süleyman nâm kimesneye bir mikdâr keçi fürûht edip yine karye-i mezbûre civârında ra‘y edip va‘desi geldikde akçesini vermek üzere iken bir gün keçileri mezbûr Süleyman sürüp İznikmid tarafına firâr eder iken bu kulları mahâll-i nizâ‘ın içinde bulunup emr şer‘in deyüp Adalar nâib[i] efendi huzûruna varılıp serdâr ve nâib bu kullarından akçe ümîdinde olup bir akçe vermem dedikde tama‘-ı hâmma düşüp mezbûr Süleyman’ın bir mikdâr akçesini alıp bu kullarını bî-günâh hilâf-ı inhâ i‘lâma dâhil ve huzûr-ı âlîlerine ihzâr olunup bu bî-günâh kulunuzu Tersâne Zindânı’na vaz‘ fermânınız sâdır olmuşdur. Lillâhi ve resûlihî devletlü merhametlü sultanım hazretlerinin merâhim-i aliyyelerinden mercûdur ki civârımızda olan kurâların eimme [ve] hutebâsından ve vilâyet ahâlîsinden keyfiyet-i ahvâli gereği gibi suâl ve tefahhus olunup vâki‘ hâl huzûr-ı âlîlerine i‘lâm olunmak bâbında ve sıhah-ı fermân-ı âlîleri ricâ olunur. Bâkī emr ü fermân merhametlü efendim sultanımındır.