Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 53 Hüküm no: 12 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Todoş'un terekesinin varislerine intikali Medîne-i Üsküdar’a muzâfe Adalar nâhiyesine tâbi‘ Kartal nâm karye mutavattınlarından iken mukaddemâ hâlik olan Todoş v. Dimitri v. Anaştaş nâm zimmînin verâseti zevce-i metrûke[si] Despoti bt. Aleksandırı nâm Nasrâniye ile sulbî kebîr oğlu Dimitraki nâm zimmîye münhasıra olup kable’l-kısme mezbûr Dimitraki dahi hâlik olup verâseti zevce-i metrûkesi Sermatinye bt. Lanbortoz nâm Nasrâniye ile anası mezbûre Despoti’ye ve sulbî sagīr oğulları Todoş ve Dimitraki’ye ve sulbiye sagīre kızları Hemakti ve Sünbüle’ye münhasıra olup kable’l-kısme mezbûr Todoş dahi hâlik olup verâseti anası mezbûre Sermatinye ile li-ebeveyn er karındaşı merkūm Dimitraki’ye ve li-ebeveyn kız karındaşları mezbûretân Hemakti ve Sünbüle’ye münhasıra olup kable’l-kısme merkūm Dimitraki dahi hâlik olup verâseti anası mezbûre Sermatinye ile li-ebeveyn kız karındaşları mezbûretân Hemakti ve Sünbüle’ye ve babasının li-ebeveyn ammisi Malamata nâm zimmîye münhasıra olup kable’l-kısme mezbûre Despoti dahi hâlike olup verâseti oğlunun kızları mezbûretân Hemakti ve Sünbüle’ye münhasıra olup kable’l-kısme mezbûre Sermatinye dahi hâlik olup verâseti zevc-i metrûku Panayot v. Miho nâm zimmî ile sadrî sagīr oğlu Todoş ve sadriye sagīre kızları Hemakti ve Sünbüle’ye ve Zograkine’ye münhasıra olup kable’l-kısme mezbûr Todoş dahi hâlik olup verâseti ancak babası merkūm Panayot’a münhasıra olup kable’l-kısme merkūm Panayot dahi hâlik olup verâseti sulbiye sagīre kızları mezbûre Zograkine ile babası merkūm Miho’ya münhasıra olup kable’l-kısme mezbûre Hemakti dahi hâlike olup verâseti li-ebeveyn kız karındaşı mezbûre Sünbüle ile li-ümmin kız karındaşı mezbûre Zograkine’ye dahi hâlike olup verâseti ancak ceddi merkūm Miho’ya münhasıra olup kable’l-kısme mezbûre Sünbüle dahi hâlike olup verâseti ancak babasının li-ebeveyn ammisi merkūm Malamata’[ya] münhasıra ve tashîh-i meseleleri bi-tarîkı’l-münâsahati’ş-şer‘iye kırk dokuz yük yetmiş altı bin altı yüz kırk sehmden olup sihâm-ı mezbûreden otuz dokuz yük altmış yedi bin yüz elli bir sehmi merkūm Malamata’[ya] ve on yük dokuz bin dört yüz seksen dokuz sehmi merkūm Miho’ya isâbeti tahakkukundan sonra mezbûr Miho v. Niko nâm zimmî meclis-i şer‘-i şerîf-i enverde merkūm Miho yirmi seneden mütecâviz gāibde ve hayat ve memâtı nâ-ma‘lûm olmağla oğlu hâlik-i merkūm Panayot ile mesfûr Panayot kızı hâlike-i mezbûre Zograkine’nin [1m/b] terekelerinden mesfûr Miho’nun hissesine ber-mûceb-i defter-i kassâm isâbet eden mâlını hıfza kıbel-i şer‘den bâ-hüccet-i şer‘iye vasî ve kayyım nasb olunan işbu bâ‘isü’l-kitâb Mehmed Ağa b. el-Hâc Hüseyin Ağa nâm kimesne ile merkūm Malamata v. Dimitraki nâm zimmî mahzarlarında ikrâr ve takrîr-i kelâm edip hâlikân-ı mezbûrânın bi’l-cümle terekelerinden tashîh-i mezkûre üzere ber-mûceb-i defter-i kassâm bana isâbet ve intikāl eden dokuz bin sekiz yüz otuz beş akçeyi ben ber-vech-i muharrer yirmi seneden mütecâviz gāibde olup hayat ve memâtım nâ-ma‘lûm olmağla vasiyy-i merkūm Mehmed Ağa bi’l-vesâye kabz etmeğin hâlâ meblağ-ı merkūm dokuz bin sekiz yüz otuz beş akçeyi vasiyy-i merkūm Mehmed Ağa yedinden bi’t-tamâm ve’l-kemâl ahz u kabz eyledim, min-ba‘d tereke-i hâlikûn-ı merkūmûna ve sâire müte‘allika âmme-i de‘âvî ve mutâlebât ve eymân ve muhâsamâtdan vasiyy-i mezbûr Mehmed Ağa ile merkūm Malamata’nın zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-ışrîn min-Şa‘bâni’l-mu‘azzam li-sene hamse ve selâsîn ve mi'e ve elf. Şuhûdü’l-hâl: Fahrü’l-emsâl İmâm İsmail Efendi b. Mehmed Efendi, Fahrü’l-akrân Mustafa Ağa b. el-Hâc Mehmed, Musa Ağa b. Mehmed, Halil Ağa b. Mehmed, Mehmed Beşe b. Hasan, İbrahim Efendi b. Mehmed, Monlâ Hasan b. Ahmed, Diğer Monla Hasan b. Ali, Veli Beşe b. Ali, Mehmed Beşe b. Ahmed, Ali Beşe b. Mahmud, İsmail Çelebi b. Şahin. İşbu bâlâda mastûr hüccetde tashîh olunan münâsaha meselesi müstakīm olmayıp sahîhi üç yük altmış sekiz bin kırk sehmden seksen yedi bin üç yüz on yedi sehmi Miho’ya ve iki yük seksen bir bin üç yüz yirmi üç sehmi Malamata’ya isâbet edip.