Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 56 Hüküm no: 15 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gebze nahiyesi Şeyhşems köyü vakfı mütevelliliğinin müstakıllen İbrahim b. Mehmed'e tevcih edilmiş olduğu Kocaeli sancağında Gekbüze nâhiyesine tâbi‘ Şeyhşems karyesi vakfının vazîfe-i mu‘ayyene ile evlâdiyet ve meşrûtiyet üzere kırk seneden berü eben an-ceddin mütevellî olan işbu râfi‘-i tevkī‘-i refî‘ü’ş-şân-ı şehriyârî kıdvetü’l-emâsil ve’l-akrân İbrahim b. Mehmed -zîde kadruhû- tevliyet-i mezbûreye müstakıllen mutasarrıf iken âhardan Mustafa evlâdiyet iddi‘â ve tevliyet-i mezbûre iştirâken tevcîh ve zamân-ı karîbde fevt oldukda yine müstakıllen mezbûr İbrahim b. Mehmed -zîde kadruhû-’ya tevcîh ve mutasarrıf iken müteveffâ Mustafa’nın evlâd-ı sagīri diğer İbrahim b. Mustafa’nın vasiyyesi ve büyük vâlidesi Raziye Hatun tevliyet-i mezbûru iddi‘â ve hâsıl olan galle-i vakıfdan hisse vermek üzere mezbûr İbrahim b. Mehmed -zîde kadruhû- va‘ad edip ve va‘adi mûcebince tevcîh ve berât verildikden sonra va‘adi meşrû‘ değildir deyü fetvâ-yı şerîf mûcebince yine kaydı ref‘ ü terkīn ve yine bir tarîkle tashîh ve bana gadr oldu deyü arzuhâl ve tevârîh-i muhtelife ile olan nizâ‘lar tafsîlen derkenâr ve yedinde olan senedâtına nazar ve i‘lâm olunmak üzere hâlâ Haremeynü’ş-şerifeyn müfettişi fermân-ı âlîşânım verilmiş iken tevliyet ve mahsûlât ve galle müstakıllen evlâdiyet ve meşrûtiyet üzere İbrahim b. Mehmed -zîde kadruhû-’nun tasarrufunda olup âharın müdâhale ve ta‘arruzuna mesâğ yoğiken nısf tevliyet diğer İbrahim b. Mustafa’ya ancak emr-i savâbdır deyü tevcîh olunmağla İbrahim b. Mustafa ref‘ ve merkūm İbrahim b. Mehmed -zîde kadruhû-’ya müstakıllen tevcîh olunmak üzere i‘lâm ve i‘lâmı mûcebince amel fermânım olmağın müfettiş i‘lâmı ve fermân-ı âlîşânım mûcebince eben an-ceddin kırk seneden mütecâviz evlâdiyet ve meşrûtiyet üzere zabt eden İbrahim b. Mehmed -zîde kadruhû-’ya müstakıllen tevcîh olunup berât-ı şerîfim verilmek ricâsına vakf-ı mezbûrun nâzırı olup bi’l-fi‘il Bâbüssa‘âdetim ağası olan iftihârü’l-havâs ve’l-mukarrabîn Hasan Ağa -dâme uluvvuhû- arz etmekle mezbûrun özr-i şer‘îsi olmadıkça nâib istihdâm etmeyip bi’n-nefs edâ-i hizmet eylemek şartıyla tevcîh olunmak fermânım olmağın hakkında mezîd inâyet-i pâdişâhânem zuhûra getirip ağa-yı mûmâ-ileyhin arzı bin yüz yirmi dokuz senesi Cemâziyelevvel’inin on üçüncü günü târîhiyle müverrah verilen ruûs-ı hümâyûnum mûcebince tevcîh edip bu berât-ı hümâyûn-ı izzet-makrûnu verdim ve buyurdum ki mezbûr İbrahim b. Mehmed -zîde kadruhû- varıp evkāf-ı mezbûrun müstakıllen evlâdiyet ve meşrûtiyet üzere mütevellîsi olup edâ-i hizmet eyledikden sonra bundan evvel vakf-ı mezbûra evlâdiyet ve meşrûtiyet üzere mütevellî olanlar vazîfe-i mu‘ayyenesine ne minvâl üzere mutasarrıf olagelmiş ise merkūm dahi ol minvâl üzere mutasarrıf ola, ol bâbda ref‘ olunan mezbûr ve taraf-ı âhardan hiç ferd mâni‘ ve dâfi‘ ve müzâhim olmayıp dahl ü ta‘arruz kılınmaya, şöyle bileler, alâmet-i şerîfe i‘timâd kılalar. Tahrîren fi’l-yevmi’s-sânî aşer min-şehri Cemâziyelevvel sene tis‘a ve ışrîn ve mi'e ve elf. [3a] An-sahrâyı Edirne Sahh İ‘lâmı mûcebince amel olunmak buyuruldu. Haremeyn Müfettişi fazîletlü efendi şer‘le görüp i‘lâm eyleyesiz deyü buyuruldu. Ma‘rûz-ı dâ‘î-i Devlet-i aliyyeleridir ki, Sâhib-i arzuhâl İbrahim dûn-ı arzuhâlde ismi mastûr olan mütevellî diğer İbrahim ile mürâfa‘a olup sâhib-i arzuhâl vakf-ı mezbûrdan menzile gallesinden kendüye ta‘yîn olunan hisseyi diğer İbrahim’den taleb edip lâkin vakf-ı mezbûr musakkafât olmayıp kurâ ve mezâri‘ olup ve mütevellî-i mezbûr diğer İbrahim berât-ı âlîşân ile tevliyet-i mezkûreye mutasarrıf olmağla hisse talebine mesâğ-ı şer‘î olmadığı huzûr-ı âlîlerine i‘lâm olundu. Fermân men [lehü]’l-emr hazretlerinindir. Fî 24 Receb sene 1131 İ‘lâm İlmî Ahmed Efendi mührüyledir. Devletlü ve merhametlü sultanım hazretleri sağ olsun. Bu kulları Şeyh Şemseddin evlâdlarından olup evlâd-ı evlâdına şart ve vakf eylediği hanın gallesi şart ve vakf üzere bu kullarına dahi ta‘yîn evlâd-ı vâkıfdan olup Kasımpaşa sâkinlerinden İbrahim nâm kimesne mütevellî olmağla galle-i mezbûr ahz u kabz edip yedimde olan senedâtım mûcebince iki seneden berü vermeyip zimmetinde müctemi‘ olmağla vakf-ı mezbûr Bâbüssa‘âdet-i şerîfe ağa nezâretinde olmağla merhameten Haremeyn-i Şerîfeyn müfettişi huzûrunda şer‘le mürâfa‘adan yedimde olan berât-ı âlîşân ve senedât-ı sâir ve fetvâ-[yı] şerîfe mûcebince galleden hissem ne ise alıverilip i‘lâm olunmak bâbında fermân-ı âlî ricâ olunur. Şâhid: Diğer İbrahim evlâd-ı vâkıfdan.