Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 66 Hüküm no: 23 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalar kazası serdarının kaza dahilindeki yeniçerileri toplayarak orduya katılması gerektiğini bildiren emir Kıdvetü’n-nüvvâbi’l-müteşerri‘în Adalar kādısı efendi -zîde ilmuhû- ve kıdvetü’l-emâsil ve’l-akrân kazâ-i mezbûrun yeniçeri serdârı -zîde kadruhû- inhâ olunur ki, memâlik-i Mahrûse-i pâdişâhîde vâki‘ kazâ ve kasabât ve kurâlarda vâki‘ yeniçeri ve cebeci ve topçu ve kulağaları bi-ecma‘ihim işbu sâl-i meymenet-iştimâlde vâki‘ sefer-i hümâyûna memûr ve bir gün evvel serdâr bayrakların açıp bir sâ‘at mukaddem evlerinden ve yerlerinden ihrâc ve ordu-yı hümâyûna mülhak olmaları bâbında bi’d-defa‘ât ekîd ve şedîd fermânlar ile sürücüler ta‘yîn ve irsâl olunup ve asâkir-i İslâm Edirne’den hareket edeli bir nice gün olup henüz sizler serdârınıza bayrağın açdırıp ve taht-ı kazânızda olan yeniçerileri cem‘ ve ordu-yı hümâyûna irsâl eylemediğiniz mesmû‘umuz olmağla işbu mektûb tahrîr ve on bir sekbânların gedikli İsmail -zîde kadruhû- irsâl olunmuşdur, vusûlünde gerekdir ki, bir ân ve bir sâ‘at tehîr ve tevakkuf eylemeyip serdârınıza bayrağın açtırıp taht-ı kazânızda vâki‘ mukīm ve müsâfir yeniçeri ve cebeci ve topçu ve kuloğulların cem‘ eyleyip bir gün evvel ve bir sâ‘at mukaddem asker-i İslâma irsâl ve îsâl eylemede takayyüd-i tâm ve sa‘y-i ihtimâm edip dirlik iddi‘âsında olanlardan nefs-i vâhid geri kalmayıp serdârı bayrağı ile ordu-yı hümâyûna revân olmada her birilerine ekîd ve şedîd tenbîhler edip hilâf-ı emr-i âlîşân vaz‘-ı hareketden her birileriniz tahazzür ve ictinâb edip mûceb-i mektûb ile âmil olasız ve’s-selâm. Tahrîren fî-evâili Cemâziyelâhire li-sene semân ve ışrîn ve mi'e ve elf. Kad vasale ileynâ fî 8 şehr-i mezbûr. El-Fakīr Mustafa b. el-Hâc Hasan Ser-sekbânân-ı Dergâh-ı âlî hâlâ.