Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 65 Hüküm no: 22 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun'un terekedeki hissesini almak üzere kocasını vekil tayin etmesi Fi’l-asl vilâyet-i Anadolu’da Kangırı kazâsına tâbi‘ Hasakça nâm karye sâkinlerinden Ahmed Bey b. el-Hâc Salih nâm kimesne medîne-i Üsküdar’a muzâfe Adalar nâhiyesinde meclis-i şer‘-i şerîf-i enverde nâhiye-i mezbûreye tâbi‘ Kartal nâm karye sâkinlerinden iken bundan akdem vefât eden Hüseyin b. Hasan b. Musa nâm kimesnenin verâseti zevce-i menkûha-i metrûkesi Fâtıma bt. Hasan nâm hatun ile zikr olunan Hasakça karyesinde sâkine li-ebeveyn kız karındaşı diğer Fâtıma nâm hatuna ve li-ebin er karındaşı Mehmed nâm müteveffânın sulbî kebîr oğlu Hasan nâm kimesneye münhasıra olduğu şer‘an zâhir oldukdan sonra müteveffâ-yı mezbûrun mecmû‘-ı mâlının sülüsüne bâ-hüccet-i şer‘iye vasiyy-i muhtârı ve bi’l-cümle muhallefâtına bi’l-verâse ve bi’l-vesâye vâzı‘atü’l-yed olan işbu râfi‘atü’l-kitâb zevce-i mezbûre Fâtıma Hatun muvâcehe üzerine da‘vâ ve takrîr-i kelâm edip zevcem mezbûre diğer Fâtıma’ya li-ebeveyn karındaşı müteveffâ-yı mezbûrun bi’l-cümle terekesinden ber-mûceb-i defter-i kassâm isâbet eden on dört bin yüz otuz akçe hisse-i irsiyesini vasiyy-i mezbûre Fâtıma Hatun’dan ahz u kabza ve kendüye îsâle zevcem merkūme hatun beni vekîl eyledi, hâlâ hisse-i mezkûresini vasiyy-i merkūmeden bi’l-vekâle taleb ederim, suâl olunsun dedikde gıbbe’s-suâl vasiyy-i merkūme cevâbında fi’l-vâki‘ tereke-i müteveffâ-yı mezbûra ber-vech-i muharrer vaz‘-ı yedini ikrâr lâkin mezbûre Fâtıma Hatun zevci merkūm Ahmed Bey’i ber-minvâl-i muharrer vekîl eylediği ma‘lûmum değildir deyü inkâr edicek, müdde‘î-i mezbûrdan ber-vech-i muharrer müdde‘âsını mübeyyine beyyine taleb olundukda udûl-ı ahrâr-ı ricâl-i Müslimînden zikr olunan Hasakça karyesi ahâlîsinden Hasan b. Mehmed ve Mehmed b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûrun li-ebeveyn kız karındaşı mezbûre Fâtıma bt. Hasan b. Musa karındaşı müteveffâ-yı mezbûrdan kendüye isâbet eden ber-mûceb-i defter-i kassâm hisse-i mezkûresini vasiyy-i merkūmeden ahz u kabza ve kendüye îsâle zevci merkūm Ahmed Bey’i bizim huzûrumuzda vekîl eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müvekkile-i mezbûre Fâtıma Hatun’un hisse-i mezkûresini vekîli olan zevci merkūm Ahmed Bey’e tamâmen teslîme vasiyy-i merkūmeye ba‘de’t-tenbîh mâ-vaka‘a bi’t-taleb ketb olundu. Fi’l-yevmi’s-sânî min-Şevvâli’l-mükerrem li-sene hamse ve selâsîn ve mi'e ve elf. Şuhûdü’l-hâl: İsmail Efendi b. Mehmed, Halil Ağa b. Mehmed, el-Hâc Ebubekir b. Halil, İbrahim Çelebi Efendi b. Mehmed, el-Hâc Ahmed b. İlyas, İsmail Çelebi b. Şahin.