Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 69 Hüküm no: 29 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Kartal köyü halkının Anasta ile kızı Despona'nın köyden çıkarılmalarını istemeleri
İsmail Efendi
Medîne-i Üsküdar’a muzâfe Adalar nâhiyesine tâbi‘ Kartal nâm karye ahâlîsinden işbu ashâbü’l-kitâb İmâm İsmail Efendi ile Mehmed Efendi ve el-Hâc Mehmed b. Yakub ve Müezzin Mehmed Efendi b. Ahmed ve Halil Ağa b. Mehmed ve Mehmed Çelebi b. Musa ve Monlâ Mehmed b. Süleyman ve Mehmed Beşe b. Ömer ve diğer Mehmed Beşe b. Ahmed ve diğer Mehmed Beşe b. Hasan ve Musa Beşe b. Mehmed ve Mustafa Beşe b. Mehmed nâm kimesneler ile karye-i mezbûre re‘âyâlarından Papaz İstornos v. Luka ve Eci Tanaş v. Luka ve Londari v. Londari ve Londari Toma ve Dimo v. Aksandı ve Danyel v. Varatlamoz ve Pandali v. Dayani ve Lava v. Magderos ve Magderos v. Ohan ve Karayani Yorgi ve Taşnos v. Danyel ve Hıristodoloş nâm zimmîler ve sâirleri bi-ecma‘ihim meclis-i şer‘-i şerîfe gelip karye-i mezbûre mutavattınlarından Anasta bt. ( ) ve kızı Despona bt. Dimitraki nâm Nasrâniyeler muvâcehelerinde her biri bess-i şekvâ eyleyip mezbûretân Anasta ve kızı Despona dâimâ kendü hâllerinde olmayıp eşkıyâ tâifesini evlerine geti[r]ip fısk u fesâd etmekden fâriğa olup kendü hâlinizde olun deyü bi’d-defa‘ât tenbîh olundukda mütenebbih olmadıklarından mâ‘adâ hatunlarımıza dahi hilâf-ı şer‘ itâle-i lisân etmeleriyle mezbûretân Anasta ve Despona’nın şerr u şürûrlarından rahatımız olmayıp âciz kalmışızdır. Mezbûretân Anasta ve Despona’nın min-ba‘d karyemizde kaldıkları hâlde cümlemiz perâkende ve perîşân olmamız emr-i mukarrer olmağla mezbûretân Anasta ve Despona’nın karyemizden ihrâc olunması matlûbumuzdur dediklerinde mezbûretân Anasta ve Despona’nın karye-i mezbûreden ihrâclarına tenbîh birle mâ-vaka‘a bi’t-taleb ketb olundu.
Fi’l-yevmi’t-tâsi‘ min-Şevvâli’l-mükerrem li-sene erba‘a ve ışrîn ve mi'e ve elf.
Şuhûdü’l-hâl: Mehmed Çelebi b. Ahmed Üsküdarî, Mehmed Bey b. Abdullah Üsküdarî, Eyüb Çelebi b. Ahmed kasaba-i Beykoz, Mehmed Çelebi b. Ebubekir Kumkapı, Veli Beşe b. Mehmed İstanbulî, Yusuf Çelebi b. Hüseyin Üsküdarî, İsmail Beşe b. Mustafa İstanbulî, Monlâ Ahmed b. Mustafa Maltepe, Mehmed Çelebi b. Salih Yakacık.
|