Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 69 Hüküm no: 30 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Mehmed b. Yakub'un Ahmed Beşe'deki alacağının tahsilini istemesi Mahmiye-i Üsküdar’a muzâfe Adalar nâhiyesine tâbi‘ Kartal nâm karye sâkinlerinden işbu sâhibü’l-kitâb el-Hâc Mehmed b. Yakub nâm kimesne meclis-i şer‘-i şerîf-i enver ve mahfil-i dîn-i münîf-i ezherde yine karye-i mezbûre[de] sâkin Ahmed Beşe b. Mustafa nâm kimesne mazharında takrîr-i kelâm ve ta‘bîr ani’l-merâm edip mezbûr Ahmed Beşe zimmetinde hukūk-ı şer‘iyeden elli kıt‘a esedî guruş hakkım olup taleb eylediğimde edâdan imtinâ‘ eder, suâl olunup şer‘an alıverilmesi matlûbumdur dedikde gıbbe’s-suâl mezbûr Ahmed Beşe cevâbında fi’l-vâki‘ mezbûr el-Hâc Mehmed’e zimmetinde elli kıt‘a esedî guruş deyni olduğunu ikrâr ü i‘tirâf edip meblağ-ı merkūm elli kıt‘a esedî guruşa mezbûr el-Hâc Mehmed’e edâya cânib-i şer‘den muhkem tenbîh birle ketb ü terkīm olunup yed-i tâlibe vaz‘ olundu, mâ-hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ aşer fî-Cumâdelâhire li-sene seb‘a ve ışrîn ve mi'e ve elf. es-Seyyid Ahmed mine’l-fakīr el-müvellâ-hilâfeten be-nâhiye-i Adalar.