Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 70 Hüküm no: 31 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar, İstavroz, Kuzguncuk, Pendik, Darıca, Kartal, Çengel, Adalar ve bağlı yerlerin ihtisap ve ihzariyesinin Mehmed b. Mahmud'a tevcihi Akzâ kuzâti’l-müslimîn mevlânâ Üsküdar kādı[sı] -[zîde] fazluhû- tevkī‘-i refî‘-i hümâyûn vâsıl olıcak ma‘lûm ola ki, Kapıcıoğullarından dârende-i fermân-ı hümâyûn Mehmed b. Mahmud südde-i sa‘âdetime gelip Üsküdar ve İstavroz ve Kuzguncuk ve karye-i Pendik ve Darıca-i Tuzla ve Kartal ve Çengel ve Adalar ve tevâbi‘inin ihzâriyesi Kapıcıoğullarına mahsûs olmağla zikr olunan kazâ ve kurânın ihtisâb ve ihzâriyesinden sekiz bin beş yüz akçe hisse Ali fevtinden kendüye tevcîh olunup berât-ı şerîfimle üzerinde olmağla berât mûcebince tarafından vekîline zabt etdirilmek emrim olmuşdur. Buyurdum ki, sâdır olan emrim üzere amel olunup zikr olunan ihtisâb ve ihzâriye mezbûr Mehmed b. Mahmud’un elinde olan berât mûcebince zabt ve tasarruf etdirip âharı dahl etdirmeyesiz, berât mûcebince hizmet mukābelesinde âid olan nesnesin alıveresiz, alâmet-i şer[îfe] i‘timâd kılasız. Tahrîren Zilhicce sene 1120