Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 71 Hüküm no: 33 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal yasakçısının görevden alınarak yerine Mehmed Beşe ve Ahmed Beşe'nin tayini İzzetlü ve fazîletlü Kartal kādısı efendi hazretlerinin huzûr-ı şerîflerine da‘avât-ı hâlisa ithâfından sonra münhâ-i muhibbâne ve muhlisânemiz budur ki, hâliyâ taht-ı hükûmetinizde vâki‘ yasakçı olan yoldaş ref‘ olup üslûb-ı sâbık üzere Dergâh-ı âlî yeniçerilerden yirmi iki bölükden Mehmed Beşe ve Ahmed Beşe nâm yoldaş kazâ-i mezbûrda yalnız iki değnek verilip yasakçı nasb ü ta‘yîn olunmağın işbu mektûb tahrîr ve irsâl-i izz-i huzûrları kılındı. Vusûlünde gerekdir ki, merkūmu yasakçılık umûrunda istihdâm edip âhardan bir ferdi dahl u ta‘arruz etdirmeyip düşen husû[s]larına bi-hasebi’ş-şer‘ ve’l-kānûn her vechile imdâd ve i‘ânet edip ve lâkin hilâf-ı şer‘-i şerîf bir kimesneye rencîde ve remîde etdirmeyesiz. Bâkī ilmi fazîlet bâd. Tahrîren fî-aşer şehr-i Zilka‘de sene ihdâ ve ışrîn ve mi'e ve elf. Halkuvvâd? Abdullah Kethüdâ-i Yeniçeriyân-ı Dergâh-ı âlî.