Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 71 Hüküm no: 34 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalar nahiyesi yeniçeri serdarının görevden alınarak yerine Süleyman'ın tayin edilmesi Şerî‘at-şi‘âr Adalar nâhiyesi nâibi efendi tahiyyât-ı sâfiyât ithâfından sonra muhibbâne inhâ olunur ki, taht-ı kazânızda vâki‘ yeniçeri serdârı ref‘ olunup yerine üslûb-ı sâbık üzere kırk yedi bölüğün Süleyman nâm yoldaş nasb u ta‘yîn olunmağın işbu mektûb tahrîr ve irsâl olunmuşdur. Vusûlünde gerekdir ki, mezbûru serdârlığı umûrunda istihdâm edip âharı dahl etdirmeyisiz ve ol cânibde vâki‘ yeniçeri ve cebeci ve topçu ve gılmân-ı acemî ve kuloğulları merkūmu üzerlerine serdâr ve zâbit bilip sözünden taşra ve re'yinden hârice vaz‘ u hareket etmeyip itâ‘at ve inkıyâd üzere olalar ve tevâif-i mezbûreden bilâ-vâris-i ma‘rûf fevt olanların muhallefâtı ve metrûkâtları ma‘rifet-i şer‘le mezbûra ahz u kabz ve sûk-ı sultânîde fürûht etdirdip hâsıl olan nükūdu mümzâ ve mahtû[m] müfredât defterleri ile bu cânibe irsâl etdirile ve lâkin hilâf-ı şer‘ ve kānûn bir ferd rencîde ve remîde etdirilmeye. Tahrîren evâil-i şehr-i Cumâdelûlâ sene isnâ ve ışrîn ve mi'e ve elf. Mustafa Ağa-yı Yeniçeriyân-ı Dergâh-ı âlî hâlâ.