Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 71 Hüküm no: 35 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalar nahiyesi yeniçeri serdarının görevden alınarak yerine Kara Mustafa'nın tayin edilmesi Şerî‘at-şi‘âr nâhiye-i Adalar kādısı efendi tahiyyât-ı sâfiyât ithâfından sonra muhibbâne inhâ olunur ki, taht-ı kazânızda vâki‘ yeniçeri serdârı ref‘ olunup yerine üslûb-ı sâbık üzere kırk dört bölüğün Kara Mustafa nâm yoldaş serdâr nasb ü ta‘yîn olunmağın işbu mektûb tahrîr ve irsâl olunmuşdur. Vusûlünde gerekdir ki, mezbûru serdârlığı umûrunda istihdâm edip âharı dahl etdirmeyesiz ve ol cânibde vâki‘ yeniçeri ve cebeci ve topçu ve gılmân-ı acemî ve kuloğulları merkūmu üzerlerine serdâr ve zâbit bilip sözünden taşra ve re'yinden hârice vaz‘ ü hareket etmeyip itâ‘at ve inkıyâd üzere olalar ve tevâif-i mezbûreden bilâ-vâris-i ma‘rûf fevt olanların muhallefât ve metrûkâtları ma‘rifet-i şer‘le mezbûra ahz u kabz ve sûk-ı sultânîde fürûht etdirip hâsıl olan nükūdu mümzâ ve mahtûm müfredât defterleriyle bu cânibe irsâl etdirile ve lâkin hilâf-ı şer‘ ve kānûn bir ferd rencîde ve remîde etdirilmeye. Tahrîren evâsıt-ı şehr-i Cumâdelûlâ sene isnâ ve ışrîn ve mi'e ve elf. Mustafa Ağa-yı Yeniçeriyân-ı Dergâh-ı âlî hâlâ.