Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 73 Hüküm no: 38 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi'nin vefatıyla vasiyetinin Hasan b. Ahmed tarafından yerine getirilmesi Defter oldur ki, medîne-i Üsküdar’a muzâfe Adalar nâhiyesine tâbi‘ Kartal nâm karye sâkinlerinden iken bundan akdem vefât eden Mehmed Çelebi b. Musa b. Abdullah nâm kimesnenin verâseti zevce-i metrûkesi Hibetullah bt. Mehmed nâm hatun ile vâlidesi Raziye bt. Mustafa nâm hatuna ve hamle tevkīf olduğu şer‘an zâhir oldukdan sonra müteveffâ-yı mezbûr hayatında sülüs mâlından altı bin akçe techîz ve tekfîne ve fazlası bi’l-izni’ş-şer‘î vücûh-ı birr ü hayra harc ü sarfa vasiyyet eylediği ba‘de’s-sübût müteveffânın vesâyâsını tenfîze ve haml-i merkūm bundan kıbel-i şer‘den li-ecli’l-maslaha vasî nasb ü ta‘yîn olunan el-Hâc Hasan b. Ahmed nâm kimesnenin haml-i merkūm zeker zuhûr edip Mehmed Ali ismi ile müsemmâ olmağın sagīr-i mezbûrun hâlâ tesviye-i emrine kıbel-i şer‘den bâ-hüccet-i şer‘iye mansûb vasiyyesi olan vâlidesi mezbûre Hibet[ullah] ile mezbûre Raziye taleb ve ma‘rifetleriyle muhâsebesi görülmeğin ber-vech-i âtî zikr olunur. Fi’l-yevmi’l-ışrîn min-Zilka‘deti’ş-şerîfe li-sene hamse ve selâsîn ve mi'e ve elf. Kuşak-ı şal, 1 150 akçe İbrik-i dest, 1 240 akçe Alaca, 1 310 akçe Sarık, 1 323 akçe Zıbın 120 akçe Çuka dolama, 1 500 akçe Çakşır 1 ve kavuk 2 481 akçe Yağmurluk, 1 150 akçe Yatağan bıçak, 1 106 akçe Tüfenk 1 ve kılıç 1 580 akçe Demir 120 akçe Handan fürûht olunan saman ve şa‘îr ve sâir eşyâdan 6.030 akçe Hane pazarlığından hâne icâresine verilen peşîn akçeden 660 akçe İstanbul’dan gelen akçe 480 akçe Cem‘an yekûn makbûz: 19.850. Yalnız on dokuz bin sekiz yüz elli akçedir. Meblağ-ı makbûz-ı mezkûrdan vasiyy-i mezbûr el-Hâc Hasan’ın ma‘rifetiyle şer‘le masrûfudur, ber-vech-i âtî zikr olunur; Defter-i kassâmda mastûr techîz ve tekfîn ve vücûh-ı birr ü hayra ber-mûceb-i vasiyyet vasiyy-i merkūmun sarf eylediği Meblağ 6.000 Defter-i kassâmda mastûr zevcesi mezbûre Hibetullah mehr-i müeccel-i müsbetesi içün verilen Meblağ 3.000 Defter-i kassâmda mastûr deyn-i müsbet-i karye-i mezbûre zâbiti Mehmed Ağa’ya verilen Meblağ 405 Defter-i kassâmda mastûr resm-i kısmet-i âdî 2.675 akçe Defter-i kassâmda mastûr kâtibiye 500 akçe Defter-i kassâmda mastûr hüddâmiye 500 akçe Defter-i kassâmda mastûr dellâliye ve çukadâriye ve masârıf-ı lâzıme 1.420 akçe Defter-i kassâmda mastûr deyn-i müsbet-i mezbûr el-Hâc Hasan 6.600 akçe Cem‘an yekûn: 21.100 19.850. Makbûz 1.250 Vasiyy-i mezbûr Hibetullah ile merkūme Raziye Hatun muvâcehelerinde talebleriyle merkūm el-Hâc Hasan’ın muhâsebesi görülüp mezbûretân merkūm el-Hâc Hasan’ın husûs-ı merkūmeye müte‘allika âmme-i da‘vâdan zimmetini ibrâ-i âm ile ibrâ ve ıskāt eyledikleri bu mahalle şerh verildi. Şuhûdü’l-hâl: İsmail Efendi b. Mehmed, Mehmed Ağa b. el-Hâc Hüseyin, İbrahim Efendi b. Mehmed, Ahmed Efendi [b.] Mustafa, Veli Beşe b. Mustafa, Mehmed Çelebi b. Ali, Mustafa b. Mehmed, es-Seyyid Mustafa Çelebi b. Bali, İsmail Çelebi b. Şahin.