Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 76 Hüküm no: 41 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakacık köyünden Mustafa'nın, kendisi çocukken Hasan Beşe tarafından el konulan tarlasını geri istemesi Medîne-i Üsküdar’a muzâfe Adalar nâhiyesine tâbi‘ Yakacık nâm karye sâkinlerinden işbu bâ‘isü’l-kitâb Mustafa nâm şâbb-ı emred meclis-i şer‘-i şerîf-i enverde zikri âtî tarlaya vâzı‘u’l-yed olan karye-i mezbûre sâkinlerinden Hasan Beşe b. Hüseyin nâm kimesne mahza[rında] üzerine da‘vâ ve takrîr-i kelâm edip babam müteveffâ-yı mezbûr Ali’den ber-mûceb-i kānûn-ı hümâyûn bana intikāl-i âdî ile intikāl eden karye-i mezbûre hâricinde Abdurrahman Ağa timârı toprağında vâki‘ bir tarafı Veli Beşe bağı ve bir tarafı diğer Hasan Beşe bağı ve tarafeyni mezbûr Hasan Beşe bağları ile mahdûd tahmînen bir keyl tohum isti‘âb eder bir kıt‘a sabangîr olan tarlamı benim hâl-i sugrumdan târîh-i kitâbdan dokuz sene mukaddem mezbûr Hasan Beşe bundan akdem vefât eden vâliden Havva bt. İsmail nâm hatundan vasiyyen olmağla bin sekiz yüz altmış akçeye iştirâ eyledim deyü kürûm gars edip hilâf-ı kānûn-ı hümâyûn zabt etmekle hâlâ ben bâliğ olup zikr olunan tarlayı yedimde olan fetvâ-yı şerîfe ve emr-i âlî mantûkunca gars eylediği kürûmunu kal‘ ve tarla-yı mezkûreyi ber-mûceb-i kānûn-ı hümâyûn bana teslîm eyle dedikde merkūm Hasan Beşe bana teslîmden imtinâ‘ eder, suâl olunup kasr-ı yedine tenbîh olunmak matlûbumdur dedikde gıbbe’s-suâl merkūm Hasan Beşe cevâbında fi’l-hakīka mârru’z-zikr sabangîr olan tarlayı târîh-i kitâbdan dokuz sene mukaddem müdde‘î-i merkūm Mustafa’nın hâl-i sugrunda vasiyyesi olan vâlidesi müteveffât-ı mezbûreden meblağ-ı merkūm bin sekiz yüz altmış akçeye iştirâ edip kürûm gars eyledim deyü zabtını ikrâr ve i‘tirâf etmeğin sagīrin arazi-i emîriyeden olan tarlasını vasiyyenin âhara bey‘i hilâf-ı kānûn ve emr-i hümâyûn olmağla müdde‘î-i mezbûrun yedinde olan fetvâ-yı şerîfe ve emr-i âlî mantûkunca mezbûr Hasan Beşe’nin zikr olunan tarlasın kürûmunu kal‘ ve kasr-ı yedine ba‘de’t-tenbîh mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Zilka‘deti’ş-şerîfe li-sene hamse ve selâsîn ve mi'e ve elf. Şuhûdü’l-hâl: Halil Ağa b. Mehmed, İsmail Çelebi b. Mehmed, Diğer İsmail Çelebi b. Şahin, Mustafa Beşe b. Serdâr, Monlâ Mustafa b. Mehmed, Ahmed Beşe b. Mustafa, Halil Beşe b. İbrahim, Osman Beşe b. Ömer.