Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 80 Hüküm no: 48 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tersane-i âmire'de yapılacak fırkateler için gerekli kerestenin Adalar nahiyesi ile Yoros kazasından tedariki Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în Mevlânâ Üsküdar kādısı -zîde fezâiluhû- ve iftihârü’l-emâcid ve’l-ekârim câmi‘ü’l-mehâmid ve’l-mekârim bi-mezîdi inâyeti’l-meliki’d-dâim bi’l-fi‘il Hâssa Bostancıbaşı ( ) -dâme mecdühû- tevkī‘-i refî‘-i hümâyûn vâsıl olıcak ma‘lûm ola ki inşâallâhu te‘âlâ sene-i âtiyede Tersâne-i âmire’mde müceddeden inşâsı fermânım olan fırkateler içün iktizâ eden ecnâs-ı kerestelerin lüzûmu ve şimdiden kat‘ ve nakli muktezî olmağla işbu emr-i şerîfim vardığı gibi Üsküdar kazâsına tâbi‘ Adalar nâhiyesinde ve Yoros kazâsında mübâya‘a ve kat‘ ve naklolunagelen ecnâs-ı keresteleri hâlâ Tersâne-i âmire’mden verilen sûret-i defter mûcebince bir gün evvel mübâya‘a ve kat‘ ve nakletdirmekde gereği gibi takayyüd ve ihtimâm eyleyip kat‘â bir türlü illet ve bahâne etdirmeyip zikr olunan mahallerden bir ân evvel tedârik ve irsâl ve teslîm-i Tersâne-i âmirem etdirmekde kemâl-i takayyüd ve ihtimâm eyleyesiz deyü fermânım olmuşdur, buyurdum ki hükm-i şerîfimle ( ) vardıkda bu bâbda sâdır olan emrim üzere amel edip dahi vech-i meşrûh üzere zikr olunan kazâ ve nevâhîlerden mübâşir-i mezbûrun yedine verilen sûret-i defter mûcebince zikr olunan ecnâs-ı keresteleri bir gün evvel mübâya‘a ve kat‘ ve nakl ve teslîm-i Tersâne-i âmirem etdirmekde gereği gibi takayyüd ve ihtimâm eyleyip ihmâl ve müsâheleden be-gāyetü’l-gāye ihtirâz ve ictinâb eyleyesiz, şöyle bil[esiz] ki zikr olunan kereste Tersâne-i âmiremin ehemm-i umûr-ı mu‘azzamasından olup bir gün evvel tedârik ve teslîm-i Tersâne-i âmirem etdirilmesi ziyâde mühim ve muktezî olmağla işbu emr-i şerîfim vardığı gibi kat‘â bir ferde inâd ve muhâlefet etdirilmeyip sûret-i defter mûcebince bir ân evvel mübâya‘a ve kat‘ ve nakl ve irsâl ve teslîm-i Tersâne-i âmirem etdirdip hidemât-ı hümâyûnda bezl-i makdûr ve sa‘y-i ihtimâm eyleyesiz, şöyle bilesiz, alâmet-i şerîfime i‘timâd kılasız. Tahrîren [fi]’l-yevmi’l-hâmis aşer [min]-şehri Şevvâl sene semân ve ışrîn ve mi'e ve elf. Kostantıniyye el-mahrûse. Vasale ileynâ fî 18 Şevvâl sene 1128