Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 81 Hüküm no: 49 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Veyis'in varislerinden kızı Hatice'nin terekeden hissesini alarak diğer varislerin zimmetlerini ibra etmesi Medîne-i Üsküdar’a muzâfe Adalar nâhiyesine tâbi‘ Soğanlık nâm karye sâkinlerinden iken bundan akdem fevt olan İbrahim b. Veyis b. Abdurrahman nâm kimesnenin verâseti zevce-i menkûha-i metrûkesi Âişe bt. Mehmed nâm hatun ile sulbî kebîr oğulları Mehmed ve Ali’ye ve sulbî sagīr oğlu Halil’e ve sulbiye kebîre kızları Fâtıma ve Hadice’ye münhasıra olduğu şer‘an zâhir ve nümâyân oldukdan sonra mezbûre Hadice’nin zâtı ba‘de’t-ta‘rîfi’ş-şer‘î meclis-i şer‘-i şerîf-i lâzımü’t-teşrîfde mecmû‘-ı tereke-i müteveffâ-yı mezbûra vâzı‘atü’l-yed olup sagīr-i mezbûrun kıbel-i şer‘den mansûb vasiyyesi olan işbu râfi‘atü’l-kitâb mezbûre Âişe Hatun muvâcehesinde bi-tav‘ihâ ikrâr ve takrîr-i kelâm edip babam müteveffâ-yı mezbûrun terekesinden defter-i kassâm nâtıka olduğu üzere benim hisseme isâbet ve intikāl eden dört bin dokuz yüz on bir akçenin üç bin sekiz yüz altmış bir akçe mukābelesinde babam müteveffâ-yı mezbûrun terekesinden olup karye-i mezbûre toprağında vâki‘ bir tarafdan Kurtiş bağı ve bir tarafdan Çırak bağı ve bir tarafdan İbrahim tarlası ve bir tarafdan Hasan Beşe bağı ile mahdûd tahmînen dört dönüm bir kıt‘a kürûmî mülk yerli bağını ve meblağ-ı bâkī-i mezbûr bin elli akçesi mukābelesinde on beş keyl buğdayı vâlidem mezbûre bana teslîm, ben dahi tesellüm [ve] kabz ve kabûl eyledim. Min-ba‘d babam müteveffâ-yı mezbûrun terekesine müte‘allika âmme-i de‘âvî ve mutâlebât ve eymân ve muhâsamâtdan vâlidem mezbûre ile karındaşlarım mezbûrûn Mehmed ve Ali ve Halil ve Fâtıma’nın zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Cumâdelûlâ li-sene semân ve aşer ve mi'e ve elf. [Şuhûdü’l-hâl]: İbrahim Efendi b. Mehmed, İbrahim Ağa b. Mustafa, Hasan Beşe b. İsmail, el-Hâc Mesud b. Hacı Ali, Halil Beşe b. Abdülbaki, Süleyman Beşe b. Abdülbaki, Mehmed Efendi b. Mustafa Arabacı, Mustafa Çelebi b. İbrahim Bey, Ömer Beşe b. Ali, Mehmed b. Hasan, Ali Halîfe b. Mustafa el-Müezzin ve gayruhum.