Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 83 Hüküm no: 53 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalar nahiyesi yeniçeri serdarı Mahmud Çavuş'un görevinde bırakılması Şerî‘at-şi‘âr Adalar nâhiyesi nâibi tahiyyât-ı sâfiyât ithâfından sonra mütehâbbe-i muhibbâne budur ki, taht-ı kazânızda vâki‘ yeniçeri serdârı olan Mahmud Çavuş’un serdârlığı kemâ-kân yine kendüye ibkā ve mukarrer kılındığın işbu mektûb tahrîr ve irsâl olunmuşdur, vusûlünde gerekdir ki mezbûru serdârlığı umûrunda istihdâm edip âharı dahl etdirmeyesiz ve ol cânibde vâki‘ yeniçeri ve cebeci ve topçu ve gılmân-ı acemî ve kuloğulları merkūmu üzerlerine serdâr ve zâbit bilip sözünden taşra ve re'yinden hâric iş etmeyip itâ‘at ve inkıyâd üzere olalar ve tevâif-i mezbûre[den] bilâ-vâris fevt olanların muhallefâtı [ve] metrûkâtların ma‘rifet-i şer‘le merkūma ahz u kabz ve sûk-ı sultânîde fürûht ve hâsıl olan nükūdu mümzâ ve mahtûm müfredât defterleriyle bu cânibe irsâl etdirile ve lâkin hilâf-ı şer‘ ve kānûn bir ferd rencîde etdirilmeye. Fî 15 şehr-i Rebî‘ülevvel sene 1120