Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 82 Hüküm no: 52 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ve tevabii cizyesini toplama görevinin Ahmed Ağa ile Eminzade Ahmed'e verilmiş olduğundan eski cizyedar Abdullah'ın müdahalesinin önlenmesi Mefâhirü’l-kuzât ve’l-hükkâm ma‘denü’l-fazl ve’l-kelâm Kocaeli ma‘a Adalar kādıları -zîde fazluhum- ve mefâhirü’l-emâsil ve’l-akrân zâbitleri -zîde kadruhum- tevkī‘-i refî‘-i hümâyûn vâsıl olıcak ma‘lûm ola ki, bin yüz yirmi bir senesine mahsûb olmak üzere İstanbul ve tevâbi‘i cizyesin cibâyeti Marmaralı? kıdvetü’l-emâcid ve’l-a‘yân Ahmed ve Eminzâde Ahmed -zîde mecdühümâ-’[ya] deruhde ve tefvîz olunmuş iken cizyedâr-ı sâbık Abdullah sekiz güne dek zimmeti olan akçeyi edâ ve a‘lâ evrâkı on bin olmak üzere ta‘ahhüd etmekle yine Abdullah’a fermân olunup ve evrâkı alıp ve cizye-i mezbûrun tevâbi‘i aklâmından olan Marmara ve İznikmid ve Kocaeli ve Haslar kādılarına ve nevâhîlerine tevzî‘ olunacak evrâklar ile tahsîldârlar göndermiş idi, lâkin ta‘ahhüdü üzere zimmetinde olan mâl sekiz güne değin edâ edemeyip iki gün dahi mürûr edip ve cizyenin tevzî‘i dahi gāyet karîb olmağla yine cizye-i mezbûrun sene-i mezbûre cibâyeti mezbûrun ta‘ahhüdü üzere merkūmlara tefvîz olunmağla zikr olunan Kocaeli cânibine gönderdiği tahsîldârların yedlerinde olan evrâkları geri bunların taraflarından ta‘yîn eylediği tahsîldârları taraflarına mührüyle tamâmen teslîm etdirmek üzere ahkâmı telhîs olundukda <> imdi telhîs mûcebince amel edip dahi vech-i meşrûh üzere cizye-i mezbûrenin sene-i mezbûre cizyeleri cibâyeti yine merkūmlara tefvîz olunmağla merkūm Abdullah’ın Kocaeli cânibine gönderdiği tahsîldârın yedinde olan evrâkları geri bunların taraflarından ta‘yîn eylediği tahsîldârları tarafına mühürleriyle tamâmen teslîm etdirdip bir türlü inâd ve muhâlefet etdirmeyesin, şöyle bilesin, alâmet-i şerîfime i‘timâd kılasın. Kostantıniyye el-mahrûse.