Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 89 Hüküm no: 66 Orijinal metin no: [17a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Ahmed Beşe'nin evini Râbia bt. Hüseyin'e satması Medîne-i Üsküdar’a muzâfe Adalar nâhiyesine tâbi‘ Kartal karyesi sükkânından Ahmed Beşe b. Mehmed nâm kimesne meclis-i şer‘-i hatîr-i lâzımü’t-tevkīrde işbu bâ‘isetü hâzihi’l-vesîka Râbia bt. Hüseyin nâm hatun mahzarında bi’t-tav‘i’s-sâf ikrâr ve takrîr-i kelâm edip silk-i mülkümde münselik olup karye-i mezbûrede vâki‘ bir tarafdan Müstecib menzili ve bir tarafdan el-Hâc Mehmed tarlası ve bir tarafdan tarîk-i hâs ve bir tarafdan tarîk-i âm ile mahdûd bir bâb fevkānî ve bir bâb tahtânî ve bir sofa ve bi'r-i mâyı ve bağçeyi müştemil mülk menzilini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı kat‘î ile merkūme Râbia Hatun’a yüz on guruşa bey‘ ve teslîm ve kabz-ı semen eylediğimde ol dahi minvâl-i muharrer üzere iştirâ ve tesellüm ve kabz eyledikden sonra semeni olan meblağ-ı merkūm yüz on guruşu merkūme Râbia Hatun yedinden bi’t-tamâm ahz u kabz eyledim, ba‘de’l-yevm menzil-i mahdûd-ı mezkûr merkūme Râbia Hatun’un mülk-i müşterâsıdır, keyfe mâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ aşer min-Rebî‘i’l-evvel li-sene ihdâ ve ışrîn ve mi'e ve elf. Şuhûdü’l-hâl: Himmet Bey İmâm, İsmail Efendi, el-Hâc Ahmed Ağa, Ebubekir Beşe, Mahmud b. Mehmed, Mehmed Çelebi Yazıcı, İsmail Beşe, el-Hâc Mehmed Ağa, Şekerci Mehmed Şahin.